Shillong, Risaw, 02: Kum shi bynta ka jingrakhe ïa ka lyngkhuh sngi kha jong u Mahatma Gandhi bad ka jingrakhe ïa ka Swachhata Hi Seva ha ka sngi Balang ka ophis jong u Executive Engineer PHE Mawkyrwat Division Cum Member Secretary District Swatch Bharat Mission jong ka South West Khasi Hills District ka la pyllait paidbah ïa ki 11 tylli ki kali kit nuit kiba tip kum ki e-Vehicle kiba dei lyngba ka skhim Swachh Bharat Mission.
Ïa kine ki kali kit nuit la aiti sha ki Cluster Village Waste Management Committee jong ka Ranikor Block da u Executive Engineer jong ka PHE Mawkyrwat Division u Bah K. Nongbsaw ha ryngkat ka jingdonlang jong ki Block Development Officer jong ka Mawkyrwat bad Ranikor ba kynthup ïa u Bah I. Lawriniang bad u Bah Steve Marwein.
Nalor kine, la sakhi lang da u SDO jong ka Mawkyrwat u Bah I. Kharbudon, u Bah F. Thongni, u SDO Ranikor u Bah Shekborlin Shiangbai, ki District Coordinator DSBM, Mawkyrwat bad kiwei kiwei.
Hadien ka jingsam ïa kine ki kali, la pynlong pat sa ïa ka Special Gram Sabha na ka bynta ban pynneh pynsah ïa ki tyllong um ha kaba la ïashim bynta da ki nongïalam shnong jong ka Ranikor bad Mawkyrwat Block.
