Shillong, Risaw, 02: Da ka jingsngewkhia ïa ka jingjur shaba palat ka jingwan buhai shnong da ki briew kiba nabar ka jylla bad kiba leh ruh ïa ki kam pyntriem ha ka imlang ka sahlang, u MLA jong ka South Shillong Constituency u Bah Sanbor Shullai ha ka sngi Balang u la lum da ka jingïalang ïa ki nongpynïaid shnong jong ki shnong kiba hap hapoh Cantontment Area ha kaba la sakhi lang da ki bor synshar ka East Khasi Hills District.
Ka jingkhot ïa kane ka jingïalang da u Bah Sanbor ka long hadien ka jingshah kem jong ka Aisha Khatun ïa kaba ju khot sin ruh kum ka Pahari kaba dei na Dhubri District jong ka jylla Assam kaba la shah kem jin san sien kynthin halor ka jingdonkti ha ka kam khaii drok hapoh kane ka jylla Meghalaya.
Ha kane ka jingïalang ba la pynlong ha ka shnong Jhalupara, Shillong la ïadonlang u Additional Deputy Commisioner ka East Khasi Hills u Bah Ronnie Wahlang, u Deputy Superitendent of Police u Bah Aiban Diengdoh, ki nongmih khmat na ka tnat Labour lem bad ki rangbah shnong bad ki paidbah kiba hapoh ka jingpeit ka Cantonment Area.
Ka jingïathir ïatai ha ka jingïalang ka la long halor ka jingïoh lad jong ki briew kiba nabar ka jylla ban buhai shnong hpoh ka nongbah Shillong kat haduh ba ka la buh jingma ïa ki trai shnong trai muluk bad ïa kiwei pat ki jaidbynriew kiba la im bad sah hapoh kane ka jylla da ki phew phew snem.
Na ka liang u Bah Sanbor u la pyntip ba katkum ki kyndon jong ka Narcotic Drugs and Psychotropic Substances Act, ki trai iing kiba ai wai iing ïa ki briew kiba khaii ïa u drug kin shah kem lang katkum ka kyndon 25 (a) jong ka Narcotic Drugs and Psychotropic Substances Act.
Kum u nongmihkhmat paidbah, u Bah Sanbor u la kyntu ïa ki trai iing haba don ki briew kiba nabar kiba thmu ban shongwai ki trai iing ki dei ban da pan ïa ka police verification bad ka electoral photo identity card ban da pynshisha nadong shadong khnang ba kin lait na kino kino ki jingeh hadien habud.
