Shillong, Risaw, 02: Ka North Eastern Electric Power Corporation Limited (NEEPCO) ha ka sngi Balang ka la shimti na ka bynta shi snem kynthih ban theh ïa ki song pynroi ha ka shnong Mawkdok-Dympep.
Ka thong jong ka NEEPCO ban shimti ïa kine ki ar tylli ki shnong ka long ban wanrah ïa ka jingkhuid jingsuba ïa ka shnong ka thaw ha kaba yn sa shim ruh saw ngut ki nongshong shnong na ka shnong Mawkdok-Dympep ban siew da ka tulop ba kin pynkhuid ïa ka shnong ka thaw manla ka sngi.
Ka shnong Mawkdok ka dei ruh kawei na ki jaka jngohkai pyrthei kaba ju khring bha ïa ki nongjngohkai pyrthei manla ka sngi namar ka jingdon jong ka jingkieng Duwan Sing Syiem bad ka dei ruh ka lynti ïaid ban leit sha ki jaka jngohkai pyrthei kiba don ha ka shnong Sohra.
Lyngba kane ka dei ka sienjam, ka NEEPCO ka la pyndait ruh da ki bording ba pynthaba jingshai ïa ka jingkieng Duwan Sing Syiem kaba la pynïap biej haduh katta katta ïa ki nongleit nongwan bad ïa ki nongjngohkai pyrthei.
Kum ka jingpynsdang ïa ka jingpynkhuid ïa ka shnong Mawkdok bad Dympep, ka NEEPCO ka la aiti ïa ki borti theh ñiut ban thep ïa ki tiar kiba pyut bad ki bym pyut.
Ïa ka bording ba pynthaba jingshai ïa ka jingkieng Duwan Sing Syiem la plie paidbah u Director (Personel) u Major General RK Jha AVSM (Retd), katba ïa ki borti theh ñiut la aiti da ka Kong Patricia Mukhim kaba la long kum ka Kongsan ha kane ka sngi.
Ha kane ka sngi, ka NEEPCO ka la pynkup burom ruh ïa ka Kong Silbi Passah kaba la ïoh pdiang dang shen ïa ka khusnam Padma Shri na ka President ka ri India bad kumjuh ruh ïa ka Kong Patricia Mukhim kum ka jingithuh ïa ka jingtrei shitom ban pynkhuid ïa ka wah Urkaliar.
U Major General RK Jha u la ai jingïaroh ïa ka NEEPCO kaba la shimkhia ban pynsahnam ïa ka jingkieng Duwan Sing Syiem bad ban wanrah ïa ka projek na ka bynta ban pynkhuid ïa ka shnong Mawkdok-Dympep ka ban long kum ka nuksa ïa ka ri India baroh kawei nangne shakhmat.
Ka Kong Patricia haba kren kum ka Kongsan ka la ong ba kane ka sienjam jong ka NEEPCO kan long kum ka jinghikai ïa ki shnong ki thaw ba kin ri bad kin sumar ïa ki khlaw ki btap bad ïa ka jingkhuid jingsumar ïa ka mei mariang.
Ka la kyntu ruh ïa ki nongshong dukan hajan ka jingkieng Duwan Sing Syiem ba kin hikai lem ïa ki nongjngohkai pyrthei ban leh khuid ïa ka mei mariang bad kyntu ruh ba kin kiar noh na kaba die ïa ki jingbam ba la song ha ki plastik bad ban hikai ïa ki nongjngohkai pyrthei ban mad ïa ki jingbam tynrai ba la song ha ki sla.
