Shillong, Risaw, 04: Ka University of Science and Technology, Meghalaya (USTM) ka la kyrpad ïa ka Sorkar Jylla ban ai jingïarap pisa khlem da kheiñ sut kaba kot T. 233 klur na ka bynta ka PA Sangma International Medical College and Hospital, kaba long ka Pprivate Medical College banyngkong eh ha ka jylla.
Haba pyntip ïa kane ha ka jingïalang bad ki lad pathai khubor ha ka sngi Thohdieng, u Chancellor jong ka USTM u Mahbubul Hoque u la ong, “ngi khmihlynti (ïa ka jingïarap pisa) T.233 klur ba khlem kheiñ ïa ka sut. Ha ki 20 snem ngin sa lah ban pynphai biang ïa baroh ka pisa (sha ka Sorkar Meghalaya).
Katkum ka jingong jong u, ka Sorkar Meghalaya ka la mynjur ban ai jingkyrshan pisa na ka bynta ka Private Medical College. Hynrei ka Sorkar kam pat shim satia ïa ka rai kaba khatduh.
U la ong ba ka National Medical Commission of India kaba hap hapoh ka jingpeit jingkhmih jong ka Ministry of Health and Family Welfare ka la ai jingmynjur ban plie ïa ka Medical College bad Hospital na ka bynta ban pynsdang noh ïa ka MBBS program kaba 150 ngut ki samla pule ka ban sdang naduh ka samoi pule jong u snem 2024.
“Kane ka Medical College kan long lyngba ka jingïatreilang bad ka Sorkar Meghalaya da ka jingïasngewthuh jingmut…watla ngim pat ïasoi ïa ka MoU,” la ong u Hoque haba ai khublei ruh ïa ka Sorkar Meghalaya bad ïa ki ophisar na ka bynta ka jingkyrshan ïa ka University.
Shuh shuh u la pyntip, “nalor, ki jingai jingsumar ba khlem donkam siew na ka bynta ki paidbah ka Meghalaya kiba leit wad jingsumar ha ki jingpang bapher bapher, ngi la tyrwa ruh ban ai bhah 40 tyllli ki MBBS Seats sha ka Jylla Meghalaya, ha kaba 25 seats ki dei kiba la tyrwa khlem da donkam ban siew pisa eiei…”
“Kum ka nuksa, ha ki College Sorkar ka bai pule ka kham duna, lehse T. 1 lak haduh T. 120000, lak kata ka dei ka dor kaba la ai da ka Sorkar Meghalaya,” u la ong.
Na ka bynta ki 15 tylli ki Seat kiba sah yn sa ai shiteng dor na ka bai pule ba ju shim da ka University bad lyngba kane, ka 25 lada khein lang ïa ka 15 Seats baroh ki long 40 tylli,” u la bynrap.
Shuh shuh, u Chancellor u la pyntip ruh ïa ki jingtyrwa jong ka University ban tei ïa ki jingshna ba thymmai katkum ka juk ba mynta.
“Ngi la don ïa ka Campus kaba heh na ka bynta ka super Special Facility, ha kaba baroh ki jait jingsumar kum ka Transplant kaba sdang naduh ka jingsumar khyllai, ka Organ transplantation, Liver transplants bad baroh ki jaid jingsumar yn sa sdang naduh u snem u ban sa wan,” u la ong.
Ha kajuh ka por, u Chancellor u la pyntip ba ka University kan sa sdang noh shen ïa ka jingpule Nursing mynta u snem.
“Ha ka Nursing Program, kumba 350 ngut ki Nurse ki la don bad nga tharai jin 275 ngut ki Nurse ki dei tang na ka jylla Meghalaya,” u la pyntip.
