Shillong, Risaw 13: U Brother Eric Steve D’Souza uba dei u nonghikai jong kiba duk ba kyrduh bad kiba shem jynjar na ka jingïasyllok ki riewniam Christians Brothers u la khlad noh ha ka sngi U Blei.
Une u riewniam u dei uba la pynlut bun tylli ki snem ha nongbah Shillong ban hikai ha St. Edmund’s School.
U Br D’Souza, u la dei u nonghikai uba la trei shitrhem ban kyntiew ïa ka pule puthi bad uba la hikai ruh ïa u aktor ba pawnam ka Bollywood u Shah Rukh Khan bad ia kiwei kiwei ki riewpawkhmat hapoh ka ri India mynba ki dang dei tang ki samla pule ha St. Columba’s School, New Delhi.
Ki kam jong u Br. D’Souza ki la paw bha ha ki jaka pule ha kylleng jong ka ri India. U la pynlut bun ki snem ha St. Edmund’s School ha Shillong, Meghalaya, ha kaba u la noh synniang shibun ha ka kam pule ban ïarap ïa ki samla pule.
La ju tip ruh ia u kum u nonghikai uba la wanrah shibun ki kam kiba thymmai ha ka kam hikai. U la ai ruh ki jinghikai kiba long shabar na ki kamra klas hadien ba u la seng ïa ka Providence School ha Meghalaya, kaba dei ka jaka pule kaba ailad ïa ki khynnah kiba wan na ki longïing kiba duna bha ka ïoh ka kot.
Baroh shi lynter ki kam shakri jong u kum u riewniam, u B. D’Souza u la hikai ha ki skul ba la pynïaid da ka jingïasyllok Christian Brothers ha West Bengal, New Delhi, Mangalore, Assam, bad Meghalaya ha kaba bun na ki samla pule ki la kiew ha ka pule puthi.
U Myntri Rangbah ka jylla u Conrad Sangma haba thoh hapoh ka rynsan X, u la ong, “da ka jingsngewsih kaba khraw, nga la ïoh ka jingtip halor ka jingkhlad noh jong u Brother Eric Steve D’Souza, uba long ruh u nongsaiñ dur ha ka pule puthi bad kumjuh ruh uba aiti met bad mynsiem ban kyntiew ïa ka kam pule ha ka jylla. Kum u dkhot jong ka jingïasyllok ki riewniam Christian Brothers, u Br. D’Souza u la pynlut bun ki snem ha St. Edmund’s School ha Shillong, ha kaba kane ka la ieh ka jingsah kynmaw halor ki kam ba radbah ba u la leh. Kum u Christian Brother ba la aiti met bad mynsiem ban shakri ïa ki paidbah ha ka pule puthi, u la don ruh ka mynsiem ban seng ïa ka Providence School, kaba dei kaba la wanrah ka jingkyrmen ïa ki khynnah pule kiba wan na ki longïing kiba tlot ka ïoh ka kot. Aiba ki kam ba la ai mynsiem jong u Br. D’Souza kan wanrah ka jingtngen ïa ka ïing ka sem jong u, ïa ka jingïasyllok ki riewniam Christian Brothers, bad ki jingim ki bym lah shuh ban ñiew kiba u la wanrah ki jingkylla lyngba ka pule puthi bad ai ba ka mynsiem jong u kan ïoh ka jingjahthait ka bymjukut.”
Kum ban shu pynkynmaw, u Myntri Rangbah ka jylla u la pule ha St. Edmund’s School, Shillong, ha shwa ba un leit pule noh ha St. Columba’s School, New Delhi.
Ka jingpynbna halor ka jingkhlad noh u Brother D’Souza la pyntip da u Brother Solomon Morris, uba dei mynta u Principal ka St. Edmund’s School, Shillong ha ka nohphai sngi jong ka sngi U Blei.
Katkum ka jingïathuh u Brother Morris, u Br. D’Souza u la khladnoh ha kane ka step ha Regina Mundi, Goa na ka daw jong ka jingban ka jingpang kaba la slem bha.
U Brother Morris u la ïathuh ruh ba ïa ka met basah jong u Brother D’Souza yn sa wanrah sha Shillong na ka bynta ban pynlong ka jingleh burom kaba khatduh.
Ka met basah jong u kan lah ban poi ha ka sngi Baar bad ka jingleit ontep kan long ha ka sngi Balang bad ïa ki jingtip ba bniah yn sa nang pyntip shuh shuh kham hadien.
