Shillong, Risaw, 14: Ka Hynñiewtrep Youths Council (HYC) ka la byrngem ba kan sa thad madan ïa ka kyrteng jong ki Pulit kiba ju donkti ban khaii drok hapoh kane ka jylla.
Kane ka jingbyrngem jong ka seng ka long hadien ba ki Pulit ka Rynjah Police Station ki la khot hajir ïa u Secretary jong ka HYC u Bah Isaac Basaïawmoit ha ka lah sngi U Blei hadien ba u Pulit SI Tanjan Toshi u la ujor da ka ejahar pyrshah ïa une u nongïalam ka seng hadien ka jingïohbat da ki dkhot ka HYC ïa ki arngut ki nongkhaii drok ha Rynjah, Shillong ha ka 1 tarik mynta u bnai.
Katkum ka jingïathuh jong u Bah Isaac, ka ujor ka long ba ki dkhot ka HYC ki pynmynsaw ïa ki arngut ki nongkhaii drok bad khanglad ruh ïa ki Pulit ban pyndep ïa ka kamram.
“Ïa ki nongkhaii drok ngi ïoh bat shwa ma ngi bad ynda ladep tohkit ngi la aiti sha ki Pulit hynrei ki Pulit kim treh ban shimti,” la ïathuh u Bah Isaac.
Haba pynrem jur halor ka jingkhot hajir jong ki Pulit ïa u Secretary ka HYC, u President ka HYC u Bah Roy Kupar Synrem ha ka jingïakren bad ki lad pathai khubor shabar ka phalor jong ka Rynjah PS u la ong, “ngi pynrem jur ïa u Sub Inspector Tanjan Toshi uba la ujor ejahar ban kynnoh bym dei ïa ki nongïalam bad ngi kwah ban ong ïa u ruh wat mlien ban thok ban lamler ïa kaba khlem leh bad kaei kaba khlem jia,”
“Ka seng kan sa buddien ïa ka jingtreikam jong ki bor Pulit. Kan sa poi ka sngi ba ngin sa thad madan wat ïa kito ki Pulit kiba don bynta ha kane ka kam khaii drok,” la maham u President ka HYC.
“Wat nym pynshit bad wat ym pyndom ïa ngi, ngi dang ïatreilang bad phi, ngi wan hangne ruh da ka jingjaijai. Lada phi dang pynshit kan sa poi ka por ba ngin wan sha thanat ym shuh da ka jingjaijai” u la ong.
“Ka Seng kan sa buddien ïa ki briew kiba don ha ka bor kiba ju don bynta ha ka kam khaii drok bad ynda ngi la lap ïa ki sakhi sabut kiba thikna ngin sa thad paidbah bad ka kyrrwoh kaba shai, ngi tip bha ki bun ki Pulit kiba ai jingkyrshan ïa ngi. Ngi kwah ban kyntu ïa kito kiba ju mlien sngewbha kiar bad lada ngi lap ngin sa thad madan ïa ki kyrteng jong ki,” la maham tyngeh u President ka HYC.
“Ka jingkhaii drok hapoh kane ka jylla, kam dei shuh tang kiba die ha ki lynti ki syngkien hynrei ki don ki briew kiba shong ha ka bor ki don bynta. Lehse dei ma ki kiba bthah ïa ki Pulit lada lap ïa ki dkhot ka HYC kiba khynra drok pynngat ïa ki ha ki kyndon bapher bapher ba kan pyntlor bor,” ong u Bah Synrem.
U la kam ruh ba kane ka jingleh jong ki Pulit ka dei ka jingpyrshang ban pyntlot bor ïa ka HYC. “Hynrei ki nongïalam bad ki dkhot ka HYC da ka jingkyrshan jong ki paidbah ngin nang khlaiñ bor, phin sa ïohi nangne shakhmat kumno ngin leh ban rat dyngkhong ïa u drok,” u la bynrap.
U la ïathuh ruh ba haduh mynta ki don ar tylli ki Case ba ki Pulit ki la ujor pyrshah ïa ki nongïalam ka HYC kawei ha Sadar Police Station bad kawei ha Rynjah Police Station.
Haba pynrem ruh ïa ka Sorkar, u Bah Synrem u la ong, “ngi la ïohbat da ki spah ngut ki khynnah kiba dih drok bad ngi la phah ïa ki sha Rehabilitation Centre haduh 140 ngut tam hynrei ki Pulit bad ka Sorkar ki leh aiu.”
“Ngi kwah ban ong ïa ki bor Pulit wat pyntieng pynsmiej ïa ki nongïalam bad ïa ki dkhot ka HYC. Ngim tieng bad ngim smiej bad ngi la mih ryngkat ka thong ban rat dyngkhong ïa u drok na kane ka jylla jong ngi. Kumba ngi la pynbna ïa ka DEED Mission jong ngi, ka jingsynran jong ki longkmie kam dei ka jingïaleh tang jong ka HYC hynrei ka dei ka jingïaleh jong ka jaidbynriew,” ong shuh shuh u Bah Synrem.
