Shillong, Risaw, 18: Shi kynhun ki hati khlaw ki la thombor da kaba pynjulor ïa ki iing ki sem, ki jingthung jingtep, ki dieng kwai, ki sohmarit, ki tympew bad kiwei kiwei ki mar rep ha ka shnong Panchiring, ka shnong kaba hap hapoh ka South West Khasi Hills Disrict kaba don markhap bad ka shnong Photkroh ha ka miet sngi Palei kumba ha ka por kumba 10:30 baje mynmiet.
Ka ing kaba la shah pynjulor ha ki hati khlaw ka dei ka iing jong u Bah Jestar Syiem bad ha kane ka jingjia donkam ba kam shym la don kano kano ka jingjia ba sngewsih.
U Myntri Shnong jong ka shnong Panchiring u Bah M Kharbani u la ïathuh ba ha ka sngi Thohdieng ki paidbah nongshong shnong ki la pyrshang ban beh ïa ki Hati khlaw hynrei kim lah leh eiei namarba ki hati khlaw kim shym la phet na kane ka shnong.
Ki paidbah jong ka shnong Panchiring ki kyrpad ïa ka Sorkar Jylla ba kan leh eiei ïa kine ki Hati khlaw namarba haduh mynta kine ki Hati Khlaw ki dang don hajan jong ka shnong kat haduh ba ka la pyntieng bad pynsyier ïa ka leit ka wan bad ka shong ka sah jong ki nongshong shnong.
