Shillong, Risaw, 26: Ka tnat Puthi jong ka Sorkar Jylla Meghalaya lyngba ka Samagra Shiksha Abhiyan (SSA) ka la ai jinghikai ha ki bynta bapher bapher sha ki palat 1,300 ngut ki khynnah skul ha kylleng ka jylla ha kane ka taiew ba la dep.
Ha ka sngi Thohdieng u Director jong ka School Education and Literacy (SE&L) u Swapnil Tembe uba dei ruh u State Project Director jong ka Samagra Shiksha Abhiyan u la don ryngkat ha ka jingpynkup burom ïa ki khynnah pule jong ka Little Flower Secondary School, Shillong.
Nalor ka jingsam ïa ki syrnot sha ki khynnah skul, la pyllait paidbah ruh ïa ka Anthem jong ka SPARK lyngba ki sur jong ki khynnah ka Litttle Flower Secondary School, Shillong ba la ai kyrteng “It Starts with a SPARK” ba la shna bad pynwan dur da u Bah Kit Shangpliang na ka kynhun tem Summersalt.
Ha kane ka jingpynkup burom, la sakhi lang da ka Principal jong ka skul ka Sister Meris Dkhar, ki dkhot jong ka AVENUES lem bad u Managing Director u Mark L. Stone, ki nonghikai bad ki kmie ki kpa jong ki khynnah skul.
Ka jingthmu jong ka SPARK ka long ban ai jinghikai hapdeng ki khynnah skul ha kaba ïadei bad ka jingshlur, ka rukom kren bad ïadei parabriew, ka jingtip tynrai shaphang ka STEM bad ka bha ka miat.
La plie pyrda nyngkong eh ïa kane ka prokram ha u ‘nai Lber 2024 bad haduh kane ka sngi la lah ban pyndep ïa ka jingai jinghikai sha ki 5,000 ngut ki khynnah skul ha ki 25 tylli ki skul ha ki 12 tylli ki distrik lyngba ka AVENUES Shillong.
Ïa kane ka prokram yn sa nang bteng shuh shuh sa sha kiwei ki skul hapoh ka jylla ha ki bnai ki ban dang wan.
