Shillong, Risaw, 30: Ka Environment Protection Cell jong ka Khasi Studens Union (KSU) ha ka sngi Balang ka la dawa ïa ki bor synshar jong ka East Khasi Hills District ban tehlakam da kaba khanglad ïa ka jingdie laitlan ïa ki bom pataka ha ka lehniam Diwali.
Ka seng hapoh ka jingïalam jong u Environment Secretary u samla Shiningstar Kharbihkhiew ka la aiti ruh da ka dorkhas ha ka Deputy Commissioner jong ka East Khasi Hills District ka Kong RM Kurbah kum shi bynta ban pyrkhing ïa ka jingde laitlan ïa ki bom pataka.
Ka KSU ka la pynpaw ba kam don jingwit ïa ka jinglehniam Diwali hynrei dei pat ban pyrkhing ruh ïa ka jingdiee laitlan ïa ki bom pakata kiba ktah ki sawdong sawkun jong ka mei mariang.
Ka seng ka la pynsngew ruh ba dei ban bud biang ïa ka jingpynbna (Notification) ba la pynmih da ka Sorkar na uwei u snem sha uwei u snem kaba kdew ba ka jingdie laitlan ïa ki bom pataka kin dei tang ïa kiba la ithuh da ki bor synshar distrik bad ruh ïa ka por ban thang dei ban pynduna katkum ka jingpynbna.
Ha kajuh ka por ka seng ka la dawa ruh ba ha ki jaka ba don ki Hospital, ki jaka pule hapoh 100 mitar bad ha ki jaka ba la pynbna kum ki “Silent Zones” dei ban khang shisyndon ban die bad ban pynbthei bom pataka.
“Ka jinglehniam Diwali lah ban rakhe ha kano kano ka rukom ka ban ym ktah ïa ka mei mariang da kaba shu pyndonkam ïa ki jingthang kum ki rongoli, ki diyas, oil lamps, eco friendly decoration, sky lanterns bad glow sticks ha kane ka jingrakhe,” la ong ka seng.
Ka Deputy Commissioner ka la pyntip sha ki nongïalam ka KSU ba ka ladep ban lum ïa ka jingïalang bad ki Sector Officer bad lada don kino kino kiba leh pyrshah kin shah pynshitom katkum ki kyndon jong ka aiñ bad ha kajuh ka por ka Deputy Commissioner ka la pyntip ruh ba la shah tang ïa ki jingrakhe kiba long Eco Friendly.
Ïa kane kajuh ka jingpynsngew jong ka KSU la shimti ruh da ki shnat treikam kiba don ha ki district bapher bapher.
