Shillong, Risaw, 30: Ki bor synshar jong ka East Khasi Hills District ha ka sngi Balang ka la pyntip paidbah ba la pyllait biang ïa ki kali ban ïaid lyngba ka Mawlonghat sha Bimola naduh ka 4 tarik Naiwieng, 2024.
Kum ban shu pynkynmaw hangne ba ka jingkhang dam ïa ka surok na Them Iewmawlong ka la jia hadien ba la mih ka jingïakynad kaba jur ha u snem 2018 hapdeng ki katto katne ki nongniah ïa ki Bos STPS bad kiwei pat ki jaidbynriew kiba shong basah ha Them Iewmawlong kat haduh ba ka la pynkhihwin ruh ïa ka nongbah Shillong baroh kawei bad ka la mih ruh ka jingdawa ïa ka Sorkar Jylla ba dei ban kyndang noh ïa ki briew kiba shong sah ha Them Iewmawlong.
Ka jingpyllait biang ban ïaid kali lyngba kane ka surok ka long ban weng ïa ka jingdheng kali ha ka thaiñ Iewduh, ong u kyrwoh ba la soi da ka Deputy Commisisoner jong ka East Khasi Hills District ka Kong RM Kurbah bad pyntip ruh ba ka jingpyllait ban ïaid kali kan long tang naduh ka por 8:00 baje mynstep haduh ka por 4:00 baje janmiet.
Katkum u kyrwoh, ka Deputy Comissioner ka la pyntip ba ïa ka surok naduh Motphran sha Mawlonghat bad na Punjabi Lane yn pynlong tang kum ka surok ‘One Way’ bad yn ym shah ïaid shuh ïa ki kali na Mawlonghat sha Motphran.
Ki kali kiba pynieng naduh Motphran sha Mawlonghat, kin hap ban pynieng sha ka liang ba ïaid ki kali khang ban pyllait ïa ka jingdheng kali.
Katto katne ki Bos kiba ju pynieng ha Mawlonghat hajan ka Traffic Point yn sa pynkynriah noh sha MUDA Parking Lot kaba don marpyrshah bad ka Anjalee Cinema Hall.
Baroh ki jait kali ba kynthup ïa ki Bos, kiba ju pynieng naduh Mawlonghat Traffic Point ter ter shajan Punjabi Lane kin hap ban ïaid noh mynta na surok Punjabi Lane ban mih sha lad Bimola.
Baroh ki jait kali kiba ju pynieng shadien ka Mawlonghat Traffic Point ter ter shaduh Anjalee Cinema Hall-Old Cherra ki lah ban ïaid sha surok ba ju ieng mynshwa ki kali ha Stand Sohra.
Baroh ki bos kin hap ban rung na lad Grand Hotel ban ïaid ter ter sha Boucher Road bad yn ym shah shuh ba kin ïaid sha Police Bazaar.
Katkum kane ka jingpynbeit ïa ka jingpynïaid kali ba thymmai, yn ym shah shuh ki Bos STPS ba kin rung sha Mawlonghat na Motphran Point hynrei kin hap ban ïaid beit sha surok Jeep Stand ter ter shaduh District Council.
Yn ym shah shuh ban pynkhun sha ka liang kadiang ïa ki Bos ynda poi ha lad Bimola hynrei lait noh ki kali rit ki lah ban rung beit ïa ki ar tylli ki lad, kata lyngba ka surok kaba poi sha Motphran bad na lad Grand Hotel.
Baroh ki kali kiba rung na Motphran Point ban ïaid sha Mawlonghat ki lah ban ïaid lyngba ka surok na Punjabi Lane bad na Anjalee Cinema Hall – Old Cherra point.
Yn ym shah shuh ban pynieng kali ha shilynter ka surok naduh lad Mawlonghat haduh lad Bimola (Punjabi Lane).
Yn ym shah shuh ban pynieng kali ha baroh arliang surok jong ka Boucher Road bad yn ym shah shuh ban lum ïa ka bai pynieng kali. Ka jingpynieng ïa ki kali kan long tang shi liang surok khnang ban pynïaid beit ïa ka leit ka wan jong ki kali.
Yn ym shah shuh ban pynieng kali ha shilynter jong ka surok naduh Grand Hotel Lad Umsohsun ter ter shaduh Motphran.
