Shillong, Risaw, 31: Ka Khasi Students’ Union (KSU) lyngba ka Employment Monitoring Cell ka la phah ïa ka dorkhas sha u Symbud Myntri Rangbah uba khmih ïa ka tnat Kam Pohing u Bah Prestone Tynsong halor ka jingbymbeit ka rukom thungkam hapoh ka Directorate of Prosecution ba la pynlong da ka Meghalaya Public Service Commission (MPSC).
“Ka Seng bad ki paidbah hi kam sngewpher shuh ïa ka jingtorti ha ka rukom thungkam thungjam lyngba ka MPSC bad kane kan dang ïai jia katba ym pat lah ban pynkylla ïa ka rukom treikam jong ka MPSC,” la kynthoh ka seng.
Ha kaba ïadei bad kane ka bynta, la khot application na bynta hynriew tylli ki post Asst. Public Prosecutor ha u snem 2023. Katkum ka advertisement kino kino kiba kwah ban aplai na bynta kine ki post, ki hap ban don lai snem ka jingtbit (experience) kaba mut ki dei ban long ki muktiar kiba la ïasaid ha iingbishar ym duna ïa ka lai snem bad ki dei ruh ban long kiba la pyndep ïa kino kino ki Criminal Cases.
“Hynrei kaba sngewlyngngoh ka long ba uwei na kine kiba pas bad mih kyrteng um shym la lah ban pynbiang ïa kitei ki kyndon ba don ha ka Advertisement,” la ong ka KSU.
“Ka Seng ka la lap ruh ba u dang shu pas ïa ka eksamin ha u snem 2023 bad lehse um ym pat lah ban pyndep ruh ïa ka eksamin All India Bar Examination (AIBE) kawei na ki eksamin ba ki Nongsaidaiñ ki hap ban pas hadien ba la ïoh ïa ka Law Degree ban lah ban ïoh laisen ban ïasaid kum u Muktiar ha Iingbishar. Ka jingshah jied jong une u nongaplai ka pyni ba ka don eiei shalyndet ba ka MPSC ka pynkheiñ hi ïa ka kyndon ba ka lah buh,” la kynthoh ka KSU.
“Haba kim pyntreikam ïa ki kyndon te ka myntoi aiu ban buh bad ha kajuh ka por ka jingdon jong kine ki kyndon ka pynlong ïa kiwei kiba dang shu pas ba ym ïoh aplai,” la ong ka seng bad bynrap, “ka ka dawa ïa ka tnat Home (Police) ba ka dei ban pynbeit ïa kine ki kynrum kynram bad ban jied ïa ki briew kiba dei hok ban ïoh.”
