Shillong, Naiwieng, 02: Kum ka jinglehkmen bad ban wanrah ïa ka jingïatylli hapdeng ki samla pule Khasi kiba pule ha skulbah North Eastern Hill University (NEHU), ka Khasi Students Union, NEHU Unit ha ka sngi Thohdieng ka la ha ka jingpynlong ïa ka Khasi General Freshers Meet, 2024.
Ha kane ka sngi, ka seng ka la pynlong ruh ïa ka rynsan ïakob na ka bynta ki samla kiba pule ha ka skulbah NEHU ha kaba ka samla Damika Susngi na ka Biochemistry Department ka la jop ïa ka nam Lukhimai ha ka liang jong ki kynthei bad u samla Kynsai Mylliem Umlong na ka Geography Department u la jop ïa ka nam Rangkynsai ha ka liang jong ki shynrang.
La sakhi lang ïa kane ka rynsan ïakob da u Chairman jong ka North East Students Organisation (NESO) u Bah Samuel B. Jyrwa uba la long kum u Kongsan, u President ka KSU Seng Kmie u samla Lamboktarwell Marngar kum u Symbud Kongsan, u General Secretary ka KSU u samla Donald V. Thabah bad u Prof. Desmond Kharmawphlang ki la long kum ki kongsan ba kyrpang bad kiwei kiwei kiba la shah khot sngewbha.
