Shillong, Naiwieng 05: Ka Meghalaya Tribal Teachers’ Association (MeTTA) kaba long ka kynhun jong ki nonghikai riewlum ha skulbah NEHU ha ka sngi Baar ka la ai jingkyrshan pura ïa ki samla pule kiba la sdang ïa ka jingshah thngan ba khlem pud sngi hakhmat ka Administrative Block.
Ki nonghikai ki la ai khublei ïa ki samla pule kiba la shong kyllaiñ myngngor hakhmat ophis treikam jong ka Administrative Block NEHU kaba dei ruh ka shlem treikam jong u Vice Chancellor jong ka skulbah NEHU u Prof. PS Shukla.
U President ka MeTTA u Dr DRL Nonglait haba kren sha ki lad pathai khubor u la ong, “hadien ba u Vice Chancellor barim u Prof SK Srivastava u la mih noh na kane ka skulbah ngi dang khmih lynti ba kiei kiei kin kham bha hynrei ka jingwan rung jong u Prof P.S Shukla ka long pynban da khongpong.”
“Ha ka jingshisha ki nonghikai ki la pyrshang shi katdei eh ban ïoh ïa u briew na la ka jong ka jaitbynriew ban shah thung kum u Vice Chancellor jong ka skulbah NEHU hynrei kane ka pulom noh,” la ïathuh u Dr. Nonglait.
“Ngim shym la lah ban leh eiei bad ngi la hap ban pdiang sngewbha ïa u Prof Shukla da kaba pyrkhat ba un leh ei ei ban kyntiew ïa ka kyrdan jong kane ka skulbah bad ban leh ïa kiei kiei na ka bynta ka jingbha jong ki samla pule bad jong ki nongtrei kane ka skulbah ba pawnam ym tang hapoh ka thaiñ Shathei Lammihngi hynrei ka jingwan shimti jong u Prof Shukla kum u Vice Chancellor ha kane ka skulbah, ka NEHU mynta ka la hiar ha ka kyrdan pule puthi,” la kynthoh u Dr. Nonglait.
Shuh shuh la ong ba ka jinglong jingman mynta ha skulbah NEHu ka long ba ki samla pule ki hap ban ïakhih na ka por sha ka por, ki nongtrei lane ki Non-Teaching Staff ruh ki hap ban pynlong jingïakhih na ka por sha ka por.
“Naduh ka lah Sngi u Blei ki nongtrei (Non-Teaching Staff) ki la sangeh treikam bad mynta ka sngi sa ki samla pule ki la shim ïa ka rai ban shah thngan khlem pud sngi. Haba ngi ïoh jingtip ba ki samla pule mynta ki la pynlong ïa ka jingïakhih bad dawa ban weng noh ïa u Registrar bad ïa ki lai ngut ki Deputy Registrar, ngi la rai ban ai ka jingkyrshan ïa ka NEHUSU bad ïa baroh ki samla pule,” la ong shuh shuh u Dr. Nonglait bad bynrap ba ka MeTTA kan ïadonlang ha syndah bad ki samla pule ha ka jingdawa jong ki
