Shillong, Naiwieng, 07: Ki samla pule jong ka skulbah North Eastern Hills University (NEHU) ha ka sngi Palei ki la thang ïa ki dur tyngshop jong u Vice Chancellor u Prof. PS Shukla, u Registrar u Omkar Singh bad u Deputy Registrar (Academics) u Amit Gupta.
Ka jingthang ïa kine ki dur tyngshop jong kine ki lai ngut ka long hadien ba ka jingïakhih da kaba shah jingit khlem pud sngi ka la jam sha ka sngi kaba lai kaba la kynjoh mynta la 48 kynta tam.
Ïa kine ki dur tyngshop la thang hakhmat ka ophis treikam Administrative Block da ka jingsakhi lang jong ki samla pule ka NEHU.
Shwa kane, ha ka por mynstep ki samla pule ki la khang tala lut ïa baroh ki khyrdop jong ka skulbah NEHU ha kaba kim shym la shah satia ïa ki kali ban rung shapoh ka skulbah kum ka jingpyntreikam ïa ka rai ban khang khyrdep ïa ka skulbah.
Ka jingpyntreikam ïa ka rai ban khang khyrdep ïa kane ka skulbah la kyrshan da ka NEHUSU bad ka KSU NEHU Unit.
Katba ki samla pule ki dang pyrta ïa ki sur pynrem shabar ka ophis treikam Administration Block, u Vice Chancellor ka NEHU u Prof PS Shukla u la mih ban ïakynduh ïa ki samla pule hynrei la sakhi pynban ba ka la mih ka thma ktien bad ka jingïania hapdeng kine ki ar liang mamla ha kaba ki samla pule kim shym la pdiang satia ïa ki rai ba la shim da ka Executive Council ha kane ka sngi.
“Ngim pdiang ïa ka jingpynshisha jong phi ha ki lad pathai khubor. Ngi kwah ba phin hiar shuki noh mardor kum u VC” la pyrta shla ki samla pule kiba ïalum lymbung hakhmat ka ophis treikam jong u VC.
“Ngim sngewtynnad ïa ka jingpynshai jong u Vice Chancellor halor ki jingdawa jong ngi. Ngi kwah ba un hiar shuki da ka jingsngewrit bad ngi kwah ba dei ban weng kam mardor ïa ki ophisar kiba u la thungkam,” ong u General Secretary ka NEHUSU u Toniho S. Kharsati.
U la ong ba ki samla pule kin ym kynran dien na kine ki jingïakhih hynrei kin dang bteng ïa ka jingïakhih tad haduh ban da pynurlong ïa ki jingdawa.
Ha ka por kumba 8:00 baje mynmiet, ki samla pule ki la kerkut ïa u Prof. PS Shukla katba u dang mih na ka kamra treikam ban leit phai noh sha la ka jaka sah da ka kali kaba don hi hapoh ka jylli jong ka skulbah NEHU.
Katba u Prof Shukla u dang shah khang kdong ha ki samla pule, la wan mih u Magistrate ban kren pynsngewthuh ïa ki samla pule ba kin pyllait ïa u Vice Chancellor ba un leit phai noh sha la ïing hadien ba la kut ki kynta treikam ha ophis.
Ki samla pule kiba la pun da ka jingbitar ki la pyrta shla da ki sur pynrem katba u Vice Chancellor u dang rung hapoh ka kali bad da ka said u Vice Chancellor u la ïoh lad ban leit phai sha la ka jaka sah.
Shwa kane, u Vice Chancellor u la phah da ka jingthoh sha ka North Eastern Hills University Students Union (NEHUSU)da ka jingkular ban thaw ïa ka Enquiry Committee hapoh ka 11 tarik mynta u bnai na ka bynta ban phah tohkit bniah ha kaba ïadei bad ka jingdawa jong ki samla pule ban weng kam mardor ïa u Registrar u Omkar Singh bad ïa u Dy. Registrar (Administration) u Amit Gupta.
“Ki don katto katne ki mat ba la dawa pyrshah ïa kine ki briew da ki samla pule ban weng kam ïa u Registrar bad ïa u Deputy Registrar. Ka University ka don katto katne ki kyndon kiba la buh ban khmih kum ïa kine ki jingeh. Kum u Vice- Chancellor, ka kamram jong nga ka long ban ïada ïa kita ki kyndon bad ki jingbthah katkum ki kyndon jong ka riti synshar. Namar kata ngan khot da ka jingïalang Executive Council ban thaw ïa ka Enquiry Committee hapoh ka 11 tarik, Naiwieng, 2024. Katkum ki jingshem na ka kaphod tohkit, yn sa shim ïa ki sienjam ba dei ban leh,” ong u VC ha ka shithi ba la phah sha ka NEHUSU.
U Vice Chancellor u la pyntip ruh ba hapoh 30 tarik, mynta u bnai un thung noh ïa ki arngut ki Pro-Vice-Chancellor na ka bynta ka Shillong bad ka Tura Campus.
“Nga kyrpad bad nga kyntu ïa phi ba phin sngewbha ban weng noh ïa ka jingïakhih khnang ba ka jinglong jingman kan wan phai biang hapoh ka skulbah” la kyrpad u VC lyngba ka shithi ba la phah sha u President ka NEHUSU.
