Shillong, Naiwieng, 07: Ki dkhot jong ka Voice of the People Party (VPP) kiba leit sha skulbah NEHU ban ïakynduh ïa u Vice Chancellor u Prof. PS Shukla ban ïakren halor ki kynrum kynram, kaba la poi haduh u pud ba ki samla pule kin pynlong da jingshah jingit kaba khlem pud sngi, ki la ngat pynban ha ka jingshah byrthen ha ki samla pule jong kane ka skulbah.
“Wat wan tuklar mano mano ruh hapdeng jong ngi,” la byrthen u President ka North Eastern Hill University (NEHUSU) u samla Sandy Sohtun katba ki dkhot jong ka VPP bad u Vice Chancellor ki dang ieng hakhmat ka ophis Administration Block.
“U kyrwoh uba shai, ngi ki samla pule jong kane ka skulbah ngi kwah ba une u VC un hiar shuki bad ngim kwah mano mano ban wan tuklar hapdeng jong ngi. Sngewbha ïa leit la ka jong ka lynti lym kumta ngin khang hapoh kane ka skulbah bad ngin shah ban mih ïano ïano ruh,” la byrthen une u nongïalam ka NEHUSU katba u Prof. Shukla bad ki dkhot ka VPP ki shu sngap jar bad ang tyngheng.
Tang shu dep kren ïa kine ki kyntien, baroh ki samla pule ryngkat bad ki nongïalam ka NEHUSU ki la mih noh ban leit phai biang sha ka jaka shah jingit.
Shwa kane, ki samla pule ki la pyrta shla da ka sur, ‘VC hiar shuki hiar shuki.”
