Shillong, Naiwieng, 14: U President jong ka NEHUSU u samla Sandy Sohtun uba la don mynta hapdeng ka jingshitom kaba jur na ka daw ka jingjur shaba palat ka jingshitom jong ka kpoh na ka jingshah thngan kaba la kynjoh la 10 sngi kynthih, ha ka janmiet sngi Palei la pynkit noh ïa u sha Shillong Civil Hospital ban ïoh ïa ka jingsumar.
Ïa une u samla la synran lang da ki para nongïalam ha ka por ba la pynkit na phyllaw ka skulbah NEHU sha Civil Hospital.
Ha ka jingïakren bad ki lad pathai khubor kawei na ki doktor jong ka Health Clinic ka skulbah NEHU kaba la peitngor baroh 24 kynta ïa ka koit ka khiah jong ki samla kiba shah thngan ki la ïathuh ba ka koit ka khiah jong ki samla pule kiba ïashim bynta ha ka jingshah thngan khlem pud sngi ki la nang hiar ha ka Blood Pressure (BP) bad kumjuh ruh ka shini ha ka met.
Ka la ong ruh, khlem ka bam ka dih ki samla kiba shah thngan kin ym lah shan satia ban shu dih beit tang da ka um baroh 24 kynta.
Kat haduh ba ka jingshah thngan ba khlem pud sngi ka la kynjoh mynta sha ka 214 kynta, ki samla kiba la tlot ki long ka samla Ibakordor Marweiñ kaba dei ka Asistant Secretary ka KSU NEHU unit, u samla Aibok Nongsteng uba bat ïa ka kyrdan Organizing Secretary ka KSU NEHU Unit, u samla Fricky Marweiñ uba bat ïa ka kyrdan Asst. Organizing Secretary ka KSU NEHU unit, u samla Robin Nongrem uba bat ïa ka kyrdan Asst. Education Secretary ka KSU NEHU unit, u samla Ruksarbiya Khonglam uba bat ïa ka kyrdan Asst. Hostel Secretary ka KSU NEHU unit.
Ïa kine ki samla sumar ha ka Health Clinic jong ka NEHU shipor bad ynda ki la kham ïohbor ki la leit phai biang sha ka jaka shong shah thngan.
