Shillong, K’lyngkot, 04: Ki Pulit ka Jhalupara Out Post kiba la pynlong ïa ka jingthwet kaba jur ki la ïohkem ïa u Saidin Ali, 27 snem ka rta halor ka jingshah kynnoh ba u dei uba donkti ban dung pynmynsaw da ka khanshi na ka durkhmat kamon bad na ka krung ïa u Deve Kharkongor , 23 snem ka rta ha ka 1 tarik mynta u bnai ha ka por shiphew duna eiei mynmiet ha ka miet leh kmen snem thymmai ha Ghumti Parking Lot kaba don ha Contonment Area, Shillong.
U Deva Kharkongor haduh mynta u dang don hapdeng ka jingshah sumar ha NEIGRIHMS Hospital, Shillong namar ka jingjur shaba palat ka jingmynsaw.
Kum ban shu pyntip hangne ba ki bahaing hasem jong u samla Deva Kharkongor ki la ujor da ka ejahar sha ki Pulit ka Jhalupara Police Outpost halor kane ka jingjia da kaba jer kyrteng ïa u Saidin Ali uba dei u khun jong ka Aisha Khatun ba ju khot sin da ka Pahari.
