Shillong, K’lyngkot, 13: Ki dkhot jong ka Hynniewtrep Integrated Territorial Organisation (HITO) Ribhoi District ryngkat ka jingsynran lang jong ki nongïalam ka Seng Kmie ha ka step phyrngab Lah Sngi u Blei ki la hiar sha ka shnong Byrnihat, Ribhoi District ban talasi naphang ïa ki kali kit syiar ha surokbah Shillong-Guwahati kiba wan nabar ka jylla ki bym bud ïa ka Standard Operating Procedures (SOP).
Ka jingshim ïa kane ka sienjam ka long hadien ba ki nongïalam ka seng ki ladep ban ujor sha u Deputy Commissioner jong ka Ribhoi District u Abhilash Baranwal ha kine ki khyndiat sngi halor ka jingshah kjit pisa jong ki kali kit syiar na ki High Level.
Ka seng ka la ujor ruh da ka ejahar pyrshah ïa ki kali kit syiar kiba wan lyngba ka Jylla Assam ki bym bud ïa ka Standard Operating Procedures ha Byrnihat Police Station.
Lyngba ki video ba la ring hi da ki dkhot ka seng ïa kiba la phah sha ka Batesi TV, ki nongïalam ka seng ki la dawa ruh ïa u Officer Incharge jong ka Byrnihat Police Station ban buddien bad ban peit pyrman ïa kane ka kam hadien ba ki nongïalam ka seng ki la lap ba ki kali kit syiar kiba wan rung sha kane ka jylla Meghalaya ki hap ban siew ruh ïa ka pisa kaba kot T. 30 haduh T. 35 hajar kawei ka kali Pickup truck sha kita ki briew kiba kam ïalade kum ki High Level.
Ki nongïalam ka seng ki la ïathuh ruh ba ha kane ka step, ki Pulit kiba don ha ka kamram ki la pynphai biang sha ka jaka ba ki wan kumba 7 tylli ki kali kit syiar shwa ba kin ïaid nakhmat ka Byrnihat Police Station.
Shuh shuh ka seng ka la pyntip ruh katba ka dang bat ïa ki kali kit syiar ka la ïatakhuh bad uwei u Pulit uba la buaid khawiang uba ka seng hi kam kwah ban pynpaw kyrteng hynrei ka seng ka la dawa ïa ka tnat Pulit ban pynshitom mardor namar ka jingbym burom shuh ïa ka Uniform wat haba u don hapdeng ka kamram.
Ka Seng ka la kyntu ruh ïa ka tnad Animal Husbandry and Vertinary (AH&Vety.) ba ka dei ban da tehlakam bad ban da pynthikna ïa ka koit ka khiah jong ki mrad bamdoh kiba la wanrah sha kane ka Jylla Meghalaya na ka bynta ka jingshngaiñ jong ki paidbah.
 | ReplyForwardAdd reaction |
