Shillong, K’lyngkot, 21: Ka jingbym don ki nongshim khia ban pynkhuid ïa ka nala kaba shlei da ka jaboh manla ka sngi ha Ïew Mawlong ka la wanrah ïa ka jingsieng iwtung kaba ktah ïa ka koit ka khiah jong ki nongshong ïew bad ki nongthied nongpet.
Kawei ka longkmie kaba ju kiew kali manla ka sngi na Stand Taxi Lummawbah ha ka jingïakren bad u nonglum khubor ka la ong, “ngi kiba ju shong kali bad kiba shong ïew man ka sngi, ngi ïohi manla ka por ka jingshlei ka um nala sha surok. Ka shem shitom ïa ki nongdie soh, ïa ki nongniah taksi (ha Stand Lummawbah) kiba im kamai jakpoh ha kaba wat ki nongshong kali ruh kim treh shuh ban kiew kali nangne. Ka um jaboh ka wan nangno nangno ruh ngim tip, tangba ka jingshlei ka um jaboh manla ka sngi ka long kaba shyrkhei.”
Ka la ong ruh wat ki nongïaid lynti ruh kim nud shuh ban ngam ha ka um nala kaba sma hek hek.
“Kum u Syiem ka Hima Mylliem bad ka tnat treikam jong ka Sorkar kiba dei peit ki dei ban pynkhuid bad ban shna. Ka lynti ka la pait lut bad ka jaboh jabaiñ bad ka um nala ka la shu tuid kat shaba mon,’ la pynpaw ka shuh shuh ka longkmie.
“Kine ki nongdie madan harud surok ki hap ban siew khajna hynrei kum ka Sorkar ka dei ban peit hynrei hangne ki nongkhrong khajna ki don haduh 3-4 ngut. Ki khrong khajna na kano ka liang ïa kata ngim tip. Nga kum ka longkmie nga sngewkhia ïa kane,” la pynpaw ka longkmie.
Ka la ïathuh ba kum ka briew kaba ju kiew kali manla ka sngi na Stand Lummawbah ka ju sakhi manla ka sngi ïa ka um jaboh kaba lyngkien hapdeng surok bad kaba tuid ruh wat ia ki katto katne ki dukan.
“Kane ka ktah ïa ka koit ka khiah. Shano ki nongpeit haba kim ju wan wat tang ban pynkhuid. Haba ki shim ïa ka khajna ki diei ban wan pynkhuid. Nga kyrpad ïa ka Hima ne Sorkar ba kin leh eiei ïa ka nala na ka bynta ka khuid ka suba,” la kyrpad kane ka longkmie.
Kawei na ki nongshong die madan ka la ong, ‘ngi siew khajna sha ki 3-4 ngut ki briew, tangba sma palat ka jingtuid ka um nala, ki briew kim don ba wan thied jingthied shuh namarba ki kynjing.”
“Manla ka por ngi kwah ïa ka jingkhuid bad haba ngi shong die jingdie ruh ngi da siew ïa ka khajna ym dei ba ngi shu ïoh shong ei,” la ong kane ka longkmie.
Sa kawei pat ka nongdie madan ka la pynpaw ba ka jingsma ka la long shaba palat. “Ym dei ba ngi shongei, ngi da siew da ka pisa, ngi hap siew ïa ka bai parking, ka bai syiem, ka sar bad ka bai seng. Ka bai sar ngi hap siew shisien shitaïew, ka bai parking, bai syiem bad bai seng ngi hap ban siew manla ka sngi. Hynrei ym don pat ban wan peit ïa ngi kat kane ka jingsma iwtung kaba la long shaba palat..”
Haba kylli, kine ki nongdie madan ki la ïathuh ba ka um jaboh ka mih na ka nala ha Ïew Mawlong.
Uwei pat u nongshong ïew u la ong ba ka jingshlei ka um nala ha kane ka jaka kam dei kaba la jia tang mynta hynrei ka dei kaba ju jïa na u snem sha u snem.
“Ym tang ki nongdie jingdie bad ki nongniah kali bad ki nongshong kali hynrei wat ki nongïaid lynti ruh ki mad ïa ka jingsma iwtung. Don ki nongshong kali ki bym lah shah ïa ka jingsma ki hap mih na kali ban leit kiew kali noh naneng,” u la bynrap.
U la kynnoh ba ka jingshlei um jong ka nala ka dei ka jingbym shimkhia na ka ophis Syiem Mylliem bad ka Sorkar.
U la ong ba ym tang ka um kaba tuid ha nala hynrei la pynlong jaka bret ñiut wat ïa ka nala da kaba bret ïa ki kot, ki plastik bad ki bilor. Na kane ka daw ka wanrah ka jingsahkut jong ka um bad ka pynmih pat ïa ka jingsma iwtung.
“Ngi kyrpad ïa ka Sorkar ba kam dei ban shu pynitynnat tang ïa ka Khyndai Lad ïa ki khap sor hynrei ka dei ban peit ruh wat ïa kane ka nala kaba ktah wat ïa ka koit ka khiah jong ngi. Lada phi shu shim ba kane ka dei tang ka them Ïew Mawlong ngim dei ki mrad ngi dei ki briew,” la kynthoh une u rangbah.
