Shillong, Rymphang, 24: Ka thaiñ Ri War ka la kyndit thret hadien ka jingñiew vote ha ka Lah Sngi u Blei na ka bynta ka Lyngkyrdem Laitkroh District Council Constituency ha kaba u Bah Rahbok Tynsong uba dei u pyrsa kur trai jong u Symbud Myntri Rangbah ka jylla u Bah Prestone Tynsong u la mad ïa ka nam rem ha ka elekshon ha u kyrtong jong ka VPP u Bah Shemborlang Rynjah.
Ka Lyngkyrdem Laitkroh Constituency ka dei kaba ju mihkhmat na ka iing ka sem jong u Bah Prestone Tynsong lait noh tang ha ka samoi kaba ladep la mihkhmat da u Bah Ryngkatlang Lyndem na ka UDP.
Ha Nongshken Constiuency ka kyrtong jong ka NPP ka Kong Grace Mary Kharpuri ka la jop biang sa shisien bad ka jingïakhun ka long kaba jwat bha bad u kyrtong ka VPP u Bah Manbha Thabah.
Ha Sohra Constiteuncy u Chief Executive Member (CEM) barim jong ka KHADC u Bah Titostarwell Chyne u lajop biang ïa kane ka elekshon da kaba pynliem ïa u kyrtong ka VPP u Bah John W. Thabah, katba ha Shella Constituency u kyrtong ka UDP Bah Barikupar Synrem u la pynliem ïa u kyrtong ka NPP u Bah Ethan Kharpuri.
Na Mawsynram Constituency, u Bah Alvin Sawkmie uba ïakhun na ka NPP u la shah jied biang ha ka wat kaba ar ha kane ka kynti.
