Shillong, Rymphang, 26: Ka Sorkar Pdeng ka lah ban pyndam noh ïa ka projek shna lynti Rel, kawei ka lynti rel kaba 22 kilomitar kaba pynïasoh na Tetelia-Byrnihat bad kaba ar ka dei kaba 108 kilomitar kaba pynïasoh ïa ka Byrnihat-Shillong hadien ba ka la mih ka jingpyrshah kaba jur na kiba bun ki kynhun kiba pawpaw ïa ka jingsheptieng na ka jingwanrung kyrthep ki briew kiba nabar.
Haba pynpaw ïa kane ha ka jingïakren bad ki lad pathai khubor ha ka sngi, u Myntri Rangbah ka Jylla Conrad K. Sangma u la pyntip ba la bthah ïa ka Sorkar Jylla ban pynphai noh ïa ka pisa T. 300 klur ba la mang ban siew ïa ka bailutksan na ka bynta ka jingpyntreikam ïa kine ki projek.
“Ka Sorkar India kam lah ban shu ap sah shi junom. Ngi la ïoh pdiang ïa ka shithi na ka Sorkar India ban pynphai noh ïa ka pisa kaba la ai na ka bynta ban shna ïa ka lynti rel kaba pynïasoh na Byrnihat bad Shillong. Namarkata, ïa kine ki ar tylli ki projek yn hap ban khangdam noh,” u la ong.
“Ngam tharai shuh ba ka lynti Rel kan urlong ban poi ha nongbah Shillong namarba ka Sorkar India ka la phah pynpha ïa ka pisa bad lada ka don ka jingkyrshan bad ka jingïoh jubab kaba shai na East Jaiñtia Hills hangta ngin sa lah ban ïaid shakhmat ïa ka projek,” la ong u Sangma bad bynrap, “ngi la eksamin ruh lada don ki katto katne ki bynta ha ka thaiñ jong ka Jylla ngin sa lah ban pynïasoh ïa ka lynti rel da ka jingmynjur lang jong ki paidbah, ngin sa pyrshang ban jam shakhmat.”
Haba pyntip ba ïa ka pisa kaba 300 klur yn hap ban pynphai sha ka Sorkar Pdeng, u Myntri Rangbah u la ong, “kaba kham kongsan ka long ka jingmang pisa na ka bynta ka jingshna ïa ka lynti Rel ha kaba ngin ïoh ïa ka GST bad kiwei kiwei ki khajna kaba kot kumba T. 10,000 klur. Kane ka pisa kan ym wan sha ngi hynrei kan leit sha ka Railways Ministry hynrei ka pisa kaba wan sha ngi kum ka bailutksan ngin hap ban pynphai noh.”
Haba kylli, u Sangma u la ong ba ka jingtyrwa ba thymmai ban shna ïa ka lynti Rel haduh Khliehriat, East Jaiñtia Hills ka dei kaba ka sorkar kan dang eksamin hadien ka jingïakren bad ki kynhun bapher bapher.
U la ong ruh ba ha kane ka juk mynta ka jingpynïasoh ïa ka lynti Rel sha ka jylla ka long kaba donkam bha haduh katta katta ban kyntiew ïa ka roi ka par bad ki paidbah ruh ki dei ban sngewthuh. “Ngi la pyrshang ban pynshai bad ban batai halor kane ka bynta. Hynrei ki don pat katto katne ki kynhun kiba ieng halor ka nongrim jong ki bad ngi ruh ngi hap ban burom ïa kata.
