Shillong, Rymphang, 26: Ka projek shna lynti Rel ka dei kawei napdeng ki shiphew tylli ki projek ba dang sahteng ïa kaba la mang na ka bynta ka jylla Meghalaya hapoh ka Development of North Eastern Region (DoNER).
Ïa kane la pyntip da u Myntri Khynnah ka Sorkar Pdeng uba khmih ïa ka tnat DoNER u Dr Sukanta Majumdar ha ka sngi Balang bad banjur ruh ba ka jingpynïasoh ïa ka leit ka wan ka long kaba donkam bha ban kyntiew ïa ka roi ka par jong ka Jylla bad ka thaiñ baroh kawei.
Ha ka jingïakren bad ki lad pathai khubor, u Dr. Majumdar u la ong, “ka (lynti rel) slem namar ki don katto katne bynta na kine ki projek kiba hap shapoh u pud u sam jong ka ri India bad ki don katto katne kiba hap sha ka ri Bangladesh. Kumba 100 persen la pyndep hynrei ka Railway Board ka la kdew ïa ki katto katne ki jngduna bad ki lad ki lynti ban pynbeit ki dang ïaid shakhmat bad hapoh khyndiat bnai ngin sa sdang noh ïa ka laiñ.”
Haba pan jubab halor ka jingpyrshah jong kiba bun ïa ka projek lynti Rel khamtam ki sengbhalang ha Meghalaya, u Myntri Khynnah u la ong, “phi tip hi ba ka jingpynïasoh ïa ka leit ka wan ka dei kaba donkam ban kyntiew ïa ka roi ka par ha kano kano ka jylla bad ha kano kano ka thaiñ. Khlem ka jingpynïasoh ïa ka leit ka wan phin ym lah ban ïoh ïa ki kam pynroi bad sa kawei pat ka mat ka long ba mynta ki la nang bun ki samla kiba la nang la stad ha manla ka jylla bad na ka bynta jong ki, phi donkam ban plie ïa ki lad ïohkam. Namarkata, nga sngew ba ngi dei ban pdiang ïa kane ka jingshisha bad ngi dei ban ïarap ban pynïasoh ïa ka jylla la ka long bad ka ri ne shabar ri bad ki bun ki kam kiba dang hap ban leh hapoh ka jingïalam jong u Myntri Rangbahduh ka ri u Narendra Modi bad kan dei ruh ka sien banyngkong ha kiba bun ki jylla ka lynti Rel kan pynïasoh sha baroh kawei ka ri. Namarkata, ka jingpynïasoh ïa ka leit ka wan ka dei kawei na ki bynta bakongsan tam.”
U la ïai ban ba ka Sorkar Meghalaya ka dei ban ithuh noh ïa ki shnong ha ki bynta khappud ban theh ïa ki song pynroi khnang ba ki projek ba kongsan kin dup urlong noh shen hapoh ka jylla.
U Myntri Khynnah u la kyntu ruh ïa ka Sorkar Jylla ban pynstet noh mardor ban pyntreikam ïa ki 10 tylli ki projek ba la sahteng.
“Ngi la ïakren ruh halor ka jingsahteng jong ki projek bad ka Sorkar Jylla ka la leh ïa kamram kaba bha bad ki kwah ban pyndep noh ïa baroh ki kam hapoh ka por ba la buh,” u la ong.
Haba kylli, u Dr Majumdar u la ong, “napdeng ki projek ba la sahteng katto katne ki dei kiba la lah ban pyntrei bad ki don pat katto katne ki bym pat lah ban pyntrei. Hapoh khyndiat sngi ka Sorkar Jyla kan sa pyntip sha ka DoNER Ministry ba kine ki projek kim dei kiba lah ban pyntrei bad ha kajuh ka por yn sa bthah ba kin pyntreikam noh da kajuh ka pisa kaba la mang na ka bynta kiwei pat ki projek. Ha kawei pat ka liang, bun na kine ki proej, ki dei kiba 100 persen kiba la lah ban pndep lane 80 persen kiba ladep hynrei kiba dang paw haduh mynta tang ha ka kot sada ki dei ki projek kiba sahteng namarba hadien ba la pyndep ïa kawei pa kawei ka projek, kan don ka kyndon ba dei ban phah ïa ka Completion Certificate bad ki don ruh ki rukom treikam jong ka sorkar hangta.”
“Ki don katto katne ki khep (ïa ki UC ym shym la aiti) hynrei ka kam ka ladep 100 persen bad ki don pat kiba dang donkam ban ïoh ïa ka Completion Certificate namarkata hapoh khyndiat bnai nga ngeit ba ka Sorkar kan sa lah ban phah ïa ka Completion Certificate,” u la ong.
Shuh shuh u Myntri Khynnah u la pyntip ba ka Meghalaya ka dei kaba lamkhmat hapoh ka SDG Group-1 kaba ïadei bad ka jingbym don shuh kiba duk, ka koit ka khiah kaba biang, ka umbam umdih hynrei ka don pat ka jingsahdien ka pule ka puthi, ki karkhana bad kiweikiwei. “Nga ngeit ba hapoh ka jingïalam jong u Myntri Rangbah, ngin sa lah ban ïalam shakhmat ïa ka Jylla,” u la bynrap.
