Shillong, Lber, 01: Ka jingïakhih bajaijai jong ki nongbylla sngi ne Casual Worker kiba la shah beh kam na Main Secretariat, Shillong ka la kynjoh mynta ha ka sngi Saitjaiñ ha ka sngi kaba ar.
Ki don kumba 30 ngut tam ki nongtrei bylla sngi ha ka kyrdan Grade-IV kiba ju trei ha ophis Secretariat, Shillong kum ki Cleaner, Peon, Mali, Chowkidar, Sweeper kiba la shah pynsangeh kam hadien ba u Nazir u la pynpaw shai ba yn ym lah shuh ban dang aikam namarba ka tnat Pla Tyngka jong ka Sorkar Jylla kam don pisa shuh ban siew ïa ka bai bylla sngi ka jong ki.
Mynta ka mih ka jingkylli, shaei kin leit wad kam haba ki la shah pynsangeh noh na kam kaba ki ju trei kum ki nongbylla sngi ne ki Casual baroh shikatta ha Main Secretariat, Shillong.
Ha ka sngi Saitjaiñ u nonglum khubor u la ïohlad ban ïakren bad ki katto katne ki nongtrei Casual kiba la shah pynsangeh na ka kam kiba dang bteng ïa ka jingïakhih kaba jaijai ha madan malki ban kyrpad biang ïa ki bor sorkar ba kin sngew kin sngap ïa ka ud ka jong ki.
Kine ki nongtrei bylla sngi ha ryngkat ki jingjaw ummat ki la pynpaw ba ki dei kiba la trei 10 snem eiei bad nalor kata ki dei ruh kiba wan na ki longing kiba kham duna ka ïoh ka kot bad kiba hap ban kit na ka bynta ban pyndap pynbiang ïa la ka jong ka iing ka sem.
Ki la ïathuh ruh ba mynta ka rta ka jong ki, kam plie lad shuh ban dang wad da kiwei pat ki kam namarba ki la shaniah beit baroh shikatta ha ka kam kaba ki ju trei bylla manla ka sngi.
Shwa kane, kine ki nongbylla sngi kiba la thaw ïa ka kynhun Casual Worker Association (CWA) ki la phah ruh da ka jingthoh sha u Myntri Rangbah ka Jylla u Conrad K. Sangma, u Myntri uba khmih ïa ka tnat Secretariat Administration Bah AL Hek, sha Chief Secretary ka Jylla Bah DP Wahlang ban sngap ïa ka jingud jingnam ka jong ki.
