Shillong, Lber, 02: Ka Jaiñtia National Council (JNC) Central Executive Committee kaba pyrshah ia ka jingthmu ban pynpoi ia ka lynti Rel sha rilum Jaiñtia ha kane ka kynti ka la shim da ka sienjam ban pynlong da ka jingiaid rally rah lama iong ha ka 6 tarik mynta u bnai ha Khliehriat, East Jaiñtia Hills District.
U President ka JNC Bah Sambormi Lyngdoh ha u kyrwoh ba la phah sha ki lad pathai khubor u la kynthoh jur ïa ka Sorkar da kaba ong, “imat ka Sorkar kam shym ïoh por ban peit ïa ki jingthoh bad ka seng ruh kam kwah shuh ban shu pynpaw ïa kano kano ka sur lyngba ki lad pathai khubor ha kaba iadei bad ka projek lynti Rel hynrei seng mynta kan sdang noh da ki jing iakhih da kaba pynlong ia ka rally bad ka jingrah lama ïong.”
“Ngi khot bad ngi wer ïa ki paradoh parasnam ka rilum Jaiñtia khamtam ïa ki para sengbhalang ba kin pyllait por khnang ban iashim bynta ha ka rally ban pyni ïa ka jingiatylli ba ki paidbah ka rilum Jaiñtia ki pyrshah jur ïa ka jingthmu ban pynpoi ïa ka lynti Rel sha rilum Jaiñtia,” u la ong.
U la pyntip ba ka jingiaid rally kan sdang na na jan ka Holy Family English School, Khliehriat bad yn pynkut pat hakhmat ka Ophis Deputy Commissioner bad ban sa pynbud pat da ka jingialang ba lyngkot hakhmat u durmot jong u Kiang Nangbah.
