Shillong, Lber, 05: Ka Hynñiewtrep Youths Council (HYC) ha ka sngi Balang ka la aiti da ka dorkhas ha u Chief Executive Member (CEM) ka Khasi Hills Autonomous District Council (KHADC) Bah Shemborlang Rynjah halor ki saw tylli ki mat kum ki jingai jingmut.
Haba kren sha ki lad pathai khubor u President ka HYC Bah Roy Kupar Synrem u la ong ba ka seng ka la pynsngew ha u CEM ba ka Council kan kan thungkam thungjam katkum ki kyndon jong ka Service Rules 1961 bad ha ka lynti kaba khuid ba suba khlem da pyndonkam bakla ïa ka bor kum ki nongmihkhmat ne ban shu thung be-aiñ kumba la jia ha ki snem ba la leit ïa kaba la paw lyngba ka CAG Report 2019.
U la ong ruh ba ka seng ka la ai jingmut ruh ha kaba ïadei bad ka jingai ïa ki Trading Licence ba ka Council kan pyntreikam pura ïa ki kyndon jong ka ‘the Khasi Hills Hills District (Trading by non-Tribals) regulation1954 bad ki Rule ba la shna da ka Council.
“Ngi la ai jingmut ruh ïa ka EC ba ha kaba ïadei bad ka jingai ïa ki Trading Licence ïa ki bym dei ki riewlum dei ban don ka kyndon ba kiba kum kita ki briew ki dei ban long ki nongshong shnong kiba pura ka jylla,” la ong u Bah Synrem.
Ka seng ka la ai jingmut ruh halor ka jingïada ïa ki khlaw ki btap bad ki tyllong um da kaba kyntu ba ka Executive Committee kan shimkhia ban pynneh pynsah ïa ki khlaw ki btap bad ki tyllong um ha kylleng u pud u sam ka Council lyngba ka jingïatreilang jong ki Dorbar Trai Ri.
“Ngi ai jingmut ruh ba dei ban pynneh pynsah ïa ka jingjyrngam ka mei mariang lyngba ka jingpynbna ‘Law-Adong’ ha kiba bun ki jaka nalor kiba la don mynta. Ngi ai jingmut ruh ban shimkhia ban pynkhie im biang bad pynkhuid ïa ki Wah kum ka Wah umkhrah, Umshyrpi bad kiwei bad kumjuhruh ban ïada ïa kiwei pat ki wah kiba don jingma lyngba ka jingleh thurmur bad pynjaboh ïa ki,” la bynrap u Bah Synrem.
Haba kyrpad ïa ka KHADC ban tehlakam ïa ka Benami, u Bah Synrem u la ong, “ngi la kyrpad ïa ka EC ban thaw ïa ki lad ki lynti kumno ban tehlakam bad pyrkhing bha halor ka khaïi ka pateng bad ka jingshim kabu jong ki briew kiba mlien ban shu kam kyrteng na ka bynta ki nongkhaïi ki bym dei ki trai ri trai muluk da kaba leh Benami. Ka Council ka dei ban leh da kaba tyngeh lada lap ïa kiba kum kita ki briew kiba leh Benami hapoh u pud u sam jong ka Council.”
