Shillong, Lber, 12: Ka Myntri ka Sorkar Jylla kaba khmih ïa ka tnat ka Koit ka Khiah ka Dr. Ampareen Lyngdoh ha ka sngi Balang ka la ong ba ka Sorkar Jylla kan sa pynurlong noh shen ban pyntreikam noh ïa ka Tura Government Medical College.
Haba ai jubab ha Iingdorbar Thawaiñ ka Jylla ha ki kynta kylli jingkylli, ka Dr. Ampareen ka la ong ba la shim ïa ki sienjam ban pynstet na ka bynta ban shna pyndep ïa ka projek.
“Ngin ym pynslem shuh ban pyndep ïa kane ka projek shwa u snem 2026-27,” la kular ka Myntri.
Ka Myntri ka la pyntip ruh ba ka Sorkar Jylla ka la khot ïa ka National Medical Council (NMC) ban pynlong ïa ka jingbishar bad jurip.
Ka la ong ba ka Sorkar ka la wadlad ban buh shuh shuh sa 180 tylli ki jingthiah khnang ban kyntiew ïa ka jingdon 400 jingthiah katkum ki kyndon jong ka NMC.
Halor ka jingkylli ba la wanrah da u Nongïalam ka Liang Pyrshah u Dr. Mukul Sangma, ka Dr. Ampareen ka la ong ba ka Tura Government Medical College ka don 75 persen.
Ka jingheh ka jaka ba la ai sngewbha da ka kur na ka bynta kane ka projek ka long 99.00 akar.
“Ka pisa ba la mang baroh da ka Sorkar India na ka bynta kane ka projek haduh mynta ka long T. 170.10 klur. Ka pisa ba la pyllait sha ka PMC haduh mynta ka long T. 185.65 klur. Ka pisa ba la pyllait sha u Kontraktor na ka bynta ka PMC haduh mynta ka long T. 178.66 klur,” la pyntip ka Myntri.
