Shillong, Lber 16: Ka seng A’chik Conscious Holistically Integrated Krima (ACHIK) ka la pynrem jur halor ka jingshah shoh dusmon uwei ki samla pule katba u dang leit sha jaka hikai Komputer ha nongbah Shillong.
Ka seng ka ong ba ki la ïohi ïa ka Video kaba la thep da ki bahaïing jong u samla ba shah shoh, la ong ba ka jingshah shoh ka la long kaba la jur bha kumta na ka liang ka seng ka pynrem jur ïa kane ka jingjia, kane ka dei ka jingpynma ïa kaba ka seng kam lah ban pdiang.
Ka seng ka dawa na ka tnad Kam Pohïing bad ki Pulit ka jylla Meghalaya ki dei ban tohkit mardor bad kem ïa kiba don kti bad ai ka aiñ kan leh ïa kaba donkam, ka tnad Kam Pohïing ka dei ban pynthikna ban ai ka jingshngaiñ ïa ki paidbah bad ïa ki riewshimet.
Kane ka jingjia ka buh ïa ki paidbah ha ka jingshong syier kaba khraw, kum ka seng ka kyntu ïa ki bor jong ka tnad Pulit ba kin leh ïa kaba don kam ban kem ïa ki nongleh kam siew bad ban pynshitom ïa ki ha ki kyndon jong ka aiñ.
Ka seng ka byrngem ban pynlong da ka jingïaid paidbah ban pynpaw ïa ka jingpyrshah ïa kane ka jingjia bad ki rah ruh sha ki bor jong ka ïing bishar ban ïoh ïa ka jingïada kaba pura, la thoh da ka seng ha u kyrwoh.
