Shillong, ïaïong, 02: U MLA ka BJP Bah AL Hek uba ong ruh u Myntri ka Sorkar Jylla ha ka sngi Balang u la takraiñ tyngeh ïa u Chief Advisor jong ka sorkar ba shipor ka ri Bangladesh u Muhammad Yunus halor ka jingkren beiñ ïa ki jylla ka thaiñ Shatei Lammihngi ka ri India ha ka jingleit jngoh kaba saw sngi ïa ka ri China.
U Yunus u la ong, “ki hynniew tylli ki jylla jong ka ri India, kiba don shaphang mihngi ka ri India, la khot ki Seven Sister. Ki don ha ka bynta jong ka dewbah India. Kim lah ban poi satia sha duriaw. Ka Bangladesh ka dei ka “nongsumar ïa ka duriaw” na ka bynta ka thaiñ. Kane ka plie lad ïa ka lad kaba khraw. Kane ka lah ban long ka jingpynïasoh ïa ka ïoh ka kot jong ka ri China.”
Haba kynthoh halor kane, u Hek u la ong ba ka Sorkar kan ym ailad satia ïa kino kino ki bor kiba nabar ban tuklar ïa ki kam pohïing jong ka ri India khamtam ïa ki bynta jong ka thaiñ Shatei Lammihngi.
“Ngin ym ailad ïa kano kano ka bor kaba nabar ban tuklar hapoh ka ri jong ngi khamtam ha ka thaiñ Shatei Lammihngi. Balei ngin shu ailad ïa ki briew kiba nabar ban wan tuklar,” la buh jingkylli u Bah Hek.
U Myntri u la ong ba kane ka jingkren jong u nongïalam ka ri Bangladesh yn ym lah satia ban pdiang.
Haba kylli, u Bah Hek u la ong, “bun ki shithi ki la leit. Balei ngin hap ban thoh? Ngi hangne ngi shongsuk shongsaiñ. Lada ngi don kino kino ki jingeh na ka jingtuklar ki bor kiba nabar ngin sa phah jingthoh hynrei kam don eiei kaba kum kata kaba hiar thma ïa ka jylla jong ngi balei ngin shu phah jingthoh ha kum kane ka khep.”
