Khliehriat, ïaïong, 23: San ngut ki mynder Bangladeshi kiba wan rung tuh shapoh u pud u sam jong ka ri India lyngba ka khappud na East Jaiñtia Hills District ki la shah bat ha ki dkhot jong ka Jaiñtia National Council (JNC) ha ka step sngi Balang katba ki dang ïaid lynti ha surokbah National Highway.
Ïa kine ki san ngut ki mynder Balngladeshi la ithuh kyrteng kum u Ranjan Muhammad, 22 snem ka rta na ka shnong Nokigonj, Sylhet, u Rojowan Ahmed 20 snem ka rta na ka shnong Sorbari, Sylhet, u Nirul Islam 20 snem ka rta na Joypur, Sylhet katba ar ngut kiwei pat ki kynthup uwei uba 18 snem ka rta bad uwei uba 17 snem ka rta.
Katkum u kyrwoh, ka JNC ka la pyntip ba ïa ki san ngut ki mynder Bangladeshi la ïoh bat da ki nongïalam ba la lamkhmat da u Chairman jong ka Employment Commission ka JNC Bah Ency Shadap ryngkat ka jingdonlang jong u Secretary ka Commission u Bah Mebanteilang Sukhlaiñ bad u Asst. Secretary ka JNC-CEC u Bah Allmiki Ryngkhlem bad ki dkhot ka JNC Khliehriat Circle.
Ha ka jingtohkit, ki san ngut ki mynder Bangladeshi ki la phla ba ki la ïoh rung shapoh u pud u sam jong ka East Jaiñtia Hills da ka jingïarap jong ki Dalal nong India kiba ohdor T.1 hajar haduh T.2 hajar marwei.
Kine ki san ngut ki la phla ba ki la wan rung sha East Jaiñtia Hills ban leit wad kam bylla ha ka karkhana dewbilat ha Umpleng, East Jaiñtia Hills District.
Ki nongïalam ka JNC tang shu dep ka jingtohkit ki la aiti noh ïa ki san ngut ki mynder Bangladeshi sha ki Pulit jong ka Infiltration kaba don ha Umtyr-a, East Jaiñtia Hills ban leh ïa kaba donkam katkum ka aiñ.
Ka JNC ka kyntu ruh ïa ki tnat Infiltration ba ki dei ban shimkhia halor kane ka kam namar ka jingïoh rung laitlan jong ki briew na ka ri Bangladesh ban ïoh rung be-aiñ da kaba suk ka buh ha ka jingma ïa ka ri bad ïa ka jylla Meghalaya.
U Bah Ency Shadap u la pynrem jur ïa ki shipai BSF kiba kheiñ sting bad kynnoh ruh ba dei na ka jingtlot jong ki shipai BSF kiba pahara ha khappud kaba la pynlong ïa ki mynder Bangladeshi ban ïoh rung tuh da kaba suk shapoh u pud u sam jong ka East Jaiñtia Hills namarba katkum ka jingphla jong ki san ngut ki mynder, ki ong ba ym don shipai BSF ha ka por ba ki la rung tuh shapoh u pud u sam jong ka ri India.
Haba maham tyngeh ïa ki Dalal myndie ri, ka Jaiñtia National Council ka la ong, “ka jingleh jong ki Dalal ka la pynhiar dor ïa ka ri jong ngi haba don kum kine ki nongdie ri. Ngi maham jur ïa phi ki Dalal khamtam kiba napoh ka district ba ngin sa thwet ïa phi ha kino kino ki jaka ba phi phi don bad ngin sa leh ïa phi da kaba tyngeh wat lada phi dei uei uei ruh ngin nym ailad satia ba phin die tad dor ïa ka ri jong ngi,” ong u Bah Shadap.
“Ka seng ka la thaw ïa ka Employment Commission ban peit pyrman khamtam ha kaba ïadei bad ka jingkyrduh kam ki samla jong ngi hynrei pynban ngi dap da ka jingsngewsih ba ki briew jong ngi pat ki wanrah da ki mynder ri ban aikam aijam, hato shaei ka lawei haba kumne?” la buh jingkylli u nongïalam ka JNC.
“Ngi maham tyngeh ïa ki heh spah ne ki malik nongai kam bylla sngi ïa ki mynder ri ha kino kino ki jaka bad ki dei ruh ban pyrkhat shwa shispah sien shwa ba phin wanrah briew nabar,” la bynrap u Bah Shadap bad ong ruh ba ka seng hi kan sa leh da kaba tyngeh nangne shakhmat namar katkum ka jingïoh jingtip jong ka seng ba ki don bun bha ki mynder Bangladeshi sha ka thaiñ Umpleng, Soo Kilo bad Ladrymbai.
