Shillong, Ïaïong 25: Ki nongshong shnong jong ka nongbah Shillong, ki la pynpaw ïa ka jingsngewsih kaba jur halor ka jingsiat ïap ki lehnoh ïa ki nongwan jngohkai pyrthei bad kumjuh ruh ïa ki mynsiem ba lui lui kaba la jia ha Pahalgam, ha kaba kane ka jingjia ka la wanrah ka jingïap jong ki 26 ngut ki mynsiem briew balui lui kiba dei ki nongshong shnong jong ka ri India.
“Ngi pynrem jur ïa kane ka jingleh riewkhlaw kaba la leh da ka kynhun ki lehnoh, kumta ban pynpaw ïa ka jingïadonlang bad ki lanot bad ban pyni ïa ka jingïeng lang jong ngi pyrshah ïa ki kam lehnoh, ka Shillong Citizens Forum da kaba burom ka kyrpad ïa baroh, bad da ka mon sngewbha, ba kin khang ïa ki dukan ne ki kam khaiï baroh kiba don ha Nongbah Shillong ha ka sngi Nyngkong ka 28 tarik mynta u bnai,” ong ka kyrwoh na ka Shillong Citizens Forum (SCF).
Kane ka Forum ka la kyrpad ruh ïa baroh ki Rangbah Shnong ka nongbah Shillong ban pynmih ïa kane ka juh ka jingkyrpad hapoh u pud u sam ki jingtreikam jong ki bad ban pynshlur da ka monsngewbha ban khang ïa baroh ki kam khaiñ ne ka jingkhang ïa ki dukan hapoh ki Shnong jong ki ha katei ka tarik ba la kdew haneng, da kane ka jingleh kan ai ka jingshakri kaba khlaiñ bor na ka bynta ka jingïalong kawei bad ban pynpaw ïa ki jingpyrshah kaba jur haba ïadei bad ki kam lehnoh.
