Shillong, Jymmang, 07: Da kaba bteng ban kyrshan jingïarap pisa sha ki hospital ba la pynïaid da ki kynhun shimet ha ka jylla khnang ban pynjanai ïa ka jingshakri ha ka koit ka khiah sha ki paidbah khamtam ïa ki longiing kiba kham duna ka ïoh ka kot, u Myntri Rangbah ka Jylla Conrad K Sangma ha ka sngi Balang u la aiti da ka Cheque kaba T. 1 klur sha ka Nazareth Hospital, Shillong.
Ka T.1 klur ba la ai ha kane ka sngi ka dei ka First Installment bad sa T.1 klur yn sa ai sha ka Nazareth Hospital ha ka Second Installment.
Haba kren ha ka jingïalang, u Sangma u la ong ba ka Sorkar ka la kut jingmut bad ban phaikhmat sha ka koit ka khiah wat hapdeng ki jingeh kiba bun.
“Ka jylla Meghalaya ka kham mang bun ïa ka bhah pisa sha ka tnat ka Koit ka Khiah haba ïanujor bad kiwei kiwei ki jylla kiba don hapoh ka ri bad ïa ka bhah ba la mang kyrpang la pyndonkam ban shna ïa ki shlem ka koit ka khiah,” u la ong.
“Ka thong jong ngi ka dei hi kajuh ban pynjanai ïa ka jingshakri, ban pynïoh ïa ka koit ka khiah kaba pura sha ki paidbah bad dei hangne ba ngi ju ïatehlok bad ki shlem ai jingsumar bapher bapher,” u la ong haba pyntip ruh ha ka jingïalang shaphang ka jingsdang bad ka jingpyntreikam ïa ka Meghalaya Health Advancement Policy.
Haba pynpaw ïa ka sngewnguh sha ki briew kiba don bynta ban shakri ha ka koit ka khiah u la kyntu ba kin shakri da ka jingieid, ka jingaitilut bad da ka jingsngewlem. U la ïaiban ruh ïa ka jingdonkam jong ki Hospital ban pynïadei bad kiwei pat ki shlem ai jingsumar khnang ban pynjanai ïa ka jingshakri ïa ki nongpang bad ban wanrah ruh ïa ka jingïadei bad ki nongtrei ha ka koit ka khiah.
Ka Administrator jong ka Nazareth Hospital, Shillong ka Sr. Noreen ka la pynpaw ïa ka jingsngewnguh ïa ka Sorkar kaba la ai jingkyrshan pisa khnang ban ïarap shuh shuh ïa ki jingdonkam jong ka hospital bad ka la ïathuh ruh ba ïa ka pisa ba la ïoh jingkyrshan yn pyndonkam na ka bynta ban thied ïa ki tiar kiba ïada ïa ka jingim jong ki nongpang bad ki Ventilator ban pyndonkam ha ka Emergency Trauma Unit, ka Maternity Care bad ha ka Neonatal Intensive Care Unit bad nalor kata yn sa pyndonkam ruh na ka bynta ka College of Nursing ka ban sa pynkha shen na ka bynta ban pdiang ïa ki 100 ngut ki samla pule manla u snem.
Ha kane ka sngi, ha ka jingaiti ïa ka Cheque la sakhi lang da u Commissioner & Secretary ka tnat ka Koit ka Khiah u Dr. Joram Beda, u National Health Mission bad Mission Director Ramakrishna Chitturi, u Auxiliary Bishop jong ka Shillong Archdiocese u Most Rev. Bernard Laloo bad u Episcopal Vicar Rev. Fr. Richard M. Majaw.
