Shillong, Jymmang, 23: U Nongïalam ka Liang Pyrshah u Dr. Mukul Sangma ha ka sngi Thohdieng u la takraiñ tyngeh ïa ka Sorkar Pdeng bad ïa ka Sorkar Jylla halor ka jingpynslem ban pynkut noh ïa ki jingeh bad ïa ki kynrum kynram hapoh ka skulbah North Eastern Hill University (NEHU).
“Ka dei ka kamram jong ka Sorkar Pdeng bad ka Sorkar Jylla ban shong bad ban wad ïa ki lad ki lynti (khnang ban pynkut noh ïa ki kynrum kynram baroh),” ong u Sangma ha ka jingïakren bad ki lad pathai khubor.
Katkum ka jingong jong u Myntri Rangbah barim, kam long hi ruh kaba sngewtynnat ïa mynta ban ïakren ïa kane ka mat.
U la ong ba ka jingpynshlem ban weng ïa ki jingeh ba dang bteng ha skulbah NEHU kan ktah ym tang ïa ka nam bad ïa ka burom jong ka skulbah kaba hap hapoh ka jingkhmih jong ka Sorkar Pdeng, ïa kaba baroh ki ju sngew sarong.
“Namarkata, la sngewdei ban kyntu ïa ka Sorkar Jylla bad ka Sorkar Pdeng ban pynthikna ïa kane ka mat yn pynbeit kloi katba lah khnang ba ka kyrteng bad ka nam jong ka University kan ym shah pynjah burom,” bynrap biang u Sangma.
Ha ka sngi Palei, ka kynhun ki arngut ki ophisar ba la phah da ka Ministry of Education ki la leit jngoh ïa ka NEHU ban bishar ïa ka jingtreikam jong kane ka skulbah.
