Shillong, Jymmang 23: Ki nongtrei Muster roll kiba trei ha Mawphlang PHE Electrical Division ki la pynpaw ïa ka jingsngewsih ba ki la mad ïa ka jingshah khate tulop 3 sngi na ka 31 sngi ba ki trei.
Ki la la pynpaw ba kane ka jingleh jong ki bor ba dei peit ka la ktah shikat dei eh bad ong ba mynta la ar bnai shiteng ba ki la shu ap ban ïoh ïa la ka bainong hynrei ynda ki la ïoh ïa ka bainong ki la lap pynban ba la khatei bainong haduh lai sngi.
“Kham mynshwa ha ka por u (L) Bah SK Sun uba dei u Engineer bad Chief Engineer barim kane ka tnat ym ju don koit kaba kum kane ka jingshah ot tulop, hynrei kynsan mynta ka la mih kane ka jingshah ot tulop ki nongtrei”, ong kitei ki nongtrei Muster roll.
Ki la pynpaw ïa ka jingsngew lyngngoh namarba ka la buh ïa ki ha ka umdum bad u dak jingkylli uba heh.
“Ngi pynpaw ïa ka jinglyngngoh kaba khraw bad buh jingkylli ruh na kaei ka daw namarba ngi ju wan trei beit manla ka sngi hynrei kumno yn shu ot tulop ïa ngi? Ngim tuklar ïa ka jingthep kam thep jam thymmai ïano ïano hynrei ngi kwah ban ïoh tang ïa kaba deihok ban ïoh namar ka um syep jong ngi kaba ngi la pynjaw kam dei ban jaw bakla shawei pat, hynrei lada ka long da kumwei pat, kata ka um syep jong ngi kan sa trei la ka jong ka kamram ha kita kiba ibeiñ ïa ngi ki rit ki ria”, la ong ki nongtrei Muster roll.
“Kiba donbor ki ïoh ïa ka tulop manla u bnai bad kata ruh ha ka dor kaba heh bad kaba palat arphew lane shiphew shah ïa kaba ngi ïoh hynrei ngi pat nalor ba ngi slem ban ïoh ïa ka tulop hynrei ngi shah ot pat sa kumne,” la buh jingkylli ki nongtrei Muster Roll.
“Lada ka ïai long sah ha kane ka rukom, ngim banse ban phah tuklar lem ha ki bor bahalor. Ngim dei ki biej ban shu kohnguh ne ban shu khñium sah na la ïing, ngi don ka jingnang jingstad kaba ngi tip ïa kaei kaba dei bad kaei ka bym dei kumno ban leh ïa ka,” ki la bynrap.
