Shillong, Jymmang, 23: Uwei u briew ïa uba la suba ba u la u la duhei ïa la ka jong ka jingim da kaba injek drok ïalade hapoh ka paiñkhana jong kawei ka Petrol Pump, ha Ribhoi District.
U Superintendent of Police ka Ribhoi District ha u kyrwoh ba la phah sha ki lad pathai khubor ha ka sngi Thohdieng u la pyntip, ha ka 22 tarim mynta u bnai ha ka por kumba 5.38 baje janmiet ki Pulit ki la ïoh jingtip ba uwei u briew bym lah ban ti kyrteng u la khang kut ïalade ha paiñkhana jong ka Meera Petrol Pump, Narbong, Ri-Bhoi District.
Hadien kata, ynda la pynpait ïa ka jingkhang la lap ba u briew u la ïapler ha madan bad u thyrnia injek ba u bat ha ka kti kamon, la pyntip u SP.
Ïa une u briew la pynkit noh sha Byrnihat PHC ban ïoh jingsumar hynrei ynda poi ha hospital ki doktor ki la pynbna ba u ladep khlad lypa.
U SP u la pyntip, ynda la pyndep ïa ki jingdonkam katkum ka aiñ ïa ka met la pynkynriah sha Civil Hospital, Nongpoh ban leh post mortem examination bad mynta la buh ïa ka met ha kamra buh metïap ha Civil Hospital.
Katkum ka jingpyntip jong u SP, une uba ïap u dei u shynrang briew, uba don ka ryngieng kaba jrong kumba 5.5 phut, ka rta kumba 30-35 snem, uba shu biang met, ka dur ba pyllun, u phong da ka patlun jean, ka t-shirt rong sohphoh bad u don ïa ka tatoo na ka kti kadiang.
