Shillong, Jylliew, 24: U Superintendent of Police ka East Khasi Hills Bah Vivek Syiem ha ka sngi Baar u la pyntip ba ki lai ngut ki briew kiba la shah kem halor ka jingdonkti ban pynjulor ïa ki sakhi sabut ba kongsan bha ha kaba ïadei bad ka jingshah pynïap u nongkhaii na Indore u Raja Raghuvanshi ha Sohra, yn sa wan ïalam sha Shillong ha ka sngi Palei ban pynlong ïa ka jingtohkit kaba bniah.
U Lokendra Singh Tomar, uba sah ha Gwalior, Madhya Pradesh bad uba dei ruh u trai jong ka iing mala ha Dewas Naka ba ka Sonam Raghuvanshi, ka nongshah suba ba hakhmat eh ha ka kam pynïap briew, ka la sah katba ka dang rieh tngen ha Indore, la kem ha ka lah sngi u Blei na Gwalior halor ka jingdonkti ban pynjulor bad buhrieh ïa ki sakhi sabut kiba kham kongsan.
Ha ka sngi u Blei, u Silome James, uba dei u trai iing uba ai wai ïa ka iing sha u Vishal Singh Chauhan, uba dei ruh uwei na ki nongshah kynnoh halor kane ka jingjia, bad u Balia Ahirwar, uba trei kum u Security Guard uba ap pahara ïa ka iing mala la kem halor ka jingpynjulor ïa ki sakhi sabut.
“Ngi la panbor hynñiew ngi ban ïoh wanrah ïa ki. Baroh lai ngut kiba la shah kynnoh yn sa wan ïalam sha Shillong bad yn sa rah sha Kashari la shi sngi (ha ka sngi Palei),” ong u Bah Syiem ha ka jingïakren bad ki lad pathai khubor.
U SP u la ong ba ha ka jingshisha, ka jingpaw pyrthei ba ka Sonam ka la sah ha kane ka iing mala ha Gwalior ka long hadien ka jingtohkit kaba bniah da ka Special Investigation Team (SIT).
Hynrei, haba ka kynhun ki Pulit ki la leit sha Gwalior ha ka 10 tarik Jylliew, ki la lap ba ka iing ka la thylli.
U Bah Syiem u ong ba ki Pulit ki don ïa ki sakhi sabut halor ka jingdonkti jong ki lai ngut ki briew kiba la shah kem ba ki pynjulor ïa ki sakhi sabut ha kaba ïadei bad ka jingpynïap briew.
“Ngi don ïa ki sakhi sabut ba ki sei ïa ka synduk ba la thep ïa ki ksiar ki ksah jong ka Sonam bad u kynjri jong u Raja,” u la bynrap.
Haba kylli, u SP u la ong, “ha ka jingshisha, kim (lai ngut kiba la shah kem) dei kiba iadon kti ha ka jingpyniap briew hynrei ki dei kiba ia donkti ban pynjulor ia ki sakhi sabut ba kongsan,” bad bynrap, “ka daw bakongsan nga lah ban ïohi hangne ka dei hi tang ka jingrhah spah. Kine ki briew ki kwah rhah namarba kiba la shah kynnoh ki la shah kem, bad ki pyrkhat da kaba ong, to ngin ia plie kaei kaba don hangne, ka lah ban don ka pisa, hynrei kim poi pyrkhat ba ki Pulit kin buddien nadong shadong. Ynda hadien ki sa sngewthuh ba ki briew kin sa wan bad kin sa tip ïa ka jingshisha, kine ki lai ngut ki phet bad na ki kam ba ki leh, ka pynpaw ba ki leh pop.”
“Ngi la rah ruh ïa ki lyngkhot lyngkhai jong ki tiar ba ladep thang nangtei. Ka Forensic Team na Madhya Pradesh ka la wan bad ngi la phah sha ki na ka bynta ban tohkit bad ngi lah ban pynthikna ka dei kaei. Ka lah ban dei ka phone. Tangba ym i don dak eiei ba kin dei ki ksiar ki ksah,” la ïathuh u Bah Syiem.
Shuh shuh u SP u la ïathuh ba ki Pulit ki la tip thikna ba ka Sonam bad u samla jong ka u Raj Singh Kushwaha ki don ka jingïadei bad ki don la ka jong ka kompeni bad ki kwah ruh ban ïatreilang ïa ka kam ka jam.
“Kine ki dang dei tang kiei kiei kiba pynpaw pyrthei ba ki kam ban pynïap ïa u Raja namarba ki kwah ban pynïaid shakhmat ïa ka kam jong ki namarba ki don ka jingïadei. Ym don eiei kaba palat ïa kata kaba la paw shabar,” u la ong haba bynrap “ngi la pynpaw ïa kane ka case bad ka dei ka jingpyrshang jong ngi ban wanrah shuh shuh ïa ki sakhi sabut bad dei na kata ka daw kam dei tang na ka jingkubur hynrei ka pyni shuh shuh ïa ki sabut pyrshah ïa kito kiba ladep kubur.
U SP u la pynpaw ka jingsngewskhem ba ki Pulit kin sa lah ban pynngat kyndon kham kloi katba lah.
Halor ka jingdawa ban leh Narco test, u Bah Syiem u la ong ba kam da donkam shuh ban leh ïa ka Narco Test ha kane ka khep.
“Ka jingleh ïa ka Narco Tes ha ka jingshisha ka dei kaba la khang da ka Supreme Court. Ïa ka Narco test ym pdiang satia da ka iingbishar. Haba ki ladep phla hi dalade ba ki leh ïa ka kam bymman, ngi ladep ban pynwandur ïa ka jingjia, ngi la buh rekod ruh ïa ki sakhi ha ka jaka ba la jia, ngam da ïohi than ba ngi hap ban leh ïa ka Narco Tes ha kane ka khep,” u la bynrap shuh shuh.
