Shillong, Naitung, 02: Ka Kashari ha ka sngi Balang ka la phah set ha Judicial Custody ïa ki lai ngut ki briew ba la kem halor ka jingpynduh pyndam ïa ki sakhi sabut ba kongsan kiba ïadei bad ka jingshah pynïap jong u nongkhaïi na Indore u Raja Raghuvanshi ha Sohra.
Ha ka jingïakren bad ki lad pathai khubor u Assistant Public Prosecutor Tushar Chanda u la ïathuh ba ïa u Shilome James, Lokendra Singh Tomar bad u Balia Ahirwar la tian bishar hakhmat ka Kashari jong u Chief Judicial Magistrate (CJM) hadien ba la kut noh mynta ka sngi ka jingset kaba hynriew sngi ha Police Custody.
“U Investigating Officer (IO) u la kyrpad ban ai bor 14 sngi ban set ha Judicial Custody. Hadien ka jingbishar, ka kashari ka la phah set ïa u Shilome James 14 sngi ha Judicial Custody bad ïa ki arngut kiwei pat, kata u Lokendra Singh Tomar bad ïa u Balia Ahirwar la phah set 7 sngi ha Judical Custody,” la pyntip u Chanda.
U Shilome James u dei u nongkhaïi iing uba la aiwai ïa ka iing sha u Vishal Singh Chauhan, uwei na ki nongshah kynoh ba donkti hakhmat eh, katba u Lokendra Singh Tomar u dei uba sah ha Gwalior, Madhya Pradesh, bad u trai jong ka ingmala kaba don ha Dewas Naka ba ka Sonam Raghuvanshi ka la riehtngen katba ka dang don ha Indore, bad u Balia Ahirwar, u dei u Security Guard uba pahara ha ka Complex jong ka iingmala ba la long trai da u Shilome James.
