Shillong, Naitung, 04: U Myntri ka tnad Social Welfare u Bah Paul Lyngdoh u la pynpaw ïa ka jingangnud jong u ban lum lang ïa ka Album jong ki jingrwai ba la thoh, la pyni, bad pynïaid da ki briew kiba don jingduna ha ki dkhot met ha kane ka khep ba dang synshar ka sorkar ba mynta.
“Nga kwah ban ïohi ba hapoh ka samoi synshar jong ka Sorkar kaba mynta ngi dei ban lah ban lum lang ïa ka Album jong ki jingrwai ba la thoh, la pynmih bad ba la pynïaid iew da ki briew kiba don jingduna ha ki dkhotmet ryngkat ka jingkyrshan jong ka tnad Social Welfare,” ong u Bah Paul haba kren ha ka jingrakhe Jubili Rupa jong kaState Society for the Implementation of Rehabilitation for Persons with Disabilities (SSIRPD) kaba la long ha u Soso Tham Auditorium ha ka sngi Thohdieng.
U la pynpaw ba ka Sorkar kan wanrah ïa ka kyrdan kaba kyrpang ha ka prokram rwai ba la kyrshan da ka tnad Jngohkai Pyrthei, kaba pynleit jingmut ha ki jingrwai ba la thoh bad pynmih da ki briew kiba don jingduna ha ki dkhotmet.
U Bah Paul uba peit ruh ïa ka tnad Jngohkai Pyrthei u la pynbna ban ai jingkyrshan ïa ka Eastern Brook Band, ka kynhun tem jong ki briew kiba don duna ka bor ïohi na Shillong.
“Ngi don hangne ban ai jingkyrshan ïa ki nongrwai kum ka tnad Jngohkai Pyrthei bad khamtam eh haba ïadei bad kito ki briew kiba don jingduna ha ki dkhotmet kan long ka jingkmen bakhraw eh jong nga ban ai jingkyrshan ïa ki kynthup ban pynsuk ïa ki jingleit iuhkjat jong ki shabar jong ka Meghalaya ha ki jaka rwai sha kiwei pat ki jaka ha ka ri bad lehse wat shabar ri,” ong u Myntri haba ïaroh ïa ka jingsngewtynnad ïa ka jingrwai ba ki la rwai ha kane ka sngi.
“Ngi don hangne ban kyrshan ïa phi bad ban pynshisha sha ka ri baroh kawei ba haba ïadei bad ka Jylla Meghalaya. Ngan sa shim ïa ka sienjam ban ong ba kane ka kynhun tem (Eastern Brook Band) mynta ka la ïasoh bad ki nongrwai kum u Stevie Wonder bad kiwei kiwei,” u la ong.
Katkum ka jingong jong u, ka Sorkar ka la thmu ban ai mynsiem ïa kine ki nongtem lyngba ka jinghikai bad ki jingshakri ban nang pyntbit shuh shuh ïa ki.
U Bah Paul u la kdew ba ki la don lypa ki rynsan kum ka YouTube bad ka Spotify ha kaba ki nongtem ki lah ban kamai bha ïa ka pisa.
U la bynrap ba ka Sorkar Jylla ka la plie paidbah ïa ka rynsan OTT ba la tip kum ka Hello Meghalaya, ïa kaba la shna pynwandur ban ai jingkyrshan ban pynpaw pyrthei ïa ka sap ka phong jong ki nongshong shnong ka jylla Meghalaya.
