Shillong, Naitung 06: U MDC barim ka GHADC bad u Minority Representative ha Meghalaya u Sofior Rahman ula ai jingkyrshan pura ïa ka Public Interest Litigation (PIL) kaba kyrpad ïa ka jingtuklar ka Meghalaya High Court halor ka jingkynnoh ba la pulom ka sorkar jylla ban pyntreikam ïa ki jingai jingmut u Commissioner for Linguistic Minorities’ ba long katkum ki jingmynjur ha ka kaiphod u snem 2016.
Ka PIL ka kyrpad ba dei ban thaw ïa ka Linguistic Minority Welfare Board (LMWB), kaba haduh mynta kam pat don satia kano kano ka jingthaw wat hapdeng ka jingai jingmynjur kaba la ïaid mynta la kumba 9 snem.
Ha ka jingkynthoh, u Rahman u la ong ba kane ka jingïaibteng ban leh klet ïa ka jingthaw ïa ka Board ban ithuh ïa ki ktien ki rit paid (linguistic minority) ka la pynkheiñ ïa ka riti synshar jong ka bad kumjuh ruh ïa ki hok ka synshar paidbah, da kaba kdew ruh ïa ki Article 29, 30, 350A, bad 350B jong ka riti synshar ka ri India.
Kine ki jingdawa ki kynthup ïa ka jingithuh ïa baroh ki jait ktien jong baroh ki kynhun rit paid ha Meghalaya, kum ka ktien Bengali, Hindi, Urdu, Assamese, Nepali, bad kiwei.
Na ka liang ka High Court ka la bthah ïa ka sorkar pdeng bad ki sorkar jylla ban pyntip ïa kane ka kam ha shwa ka jingshim bishar ka ban sa long ha ka 10 tarik u Naitung, 2025.
U Rahman u la ong ba ki jingdawa jong ki kynhun rit paid kynthup ïa ka jingthaw ba mardor ïa ka Linguistic Minority Welfare Board; ka jingpyntreikam pura ïa ki Article 29, 30, 350A, bad 350B jong ka riti synshar ka ri India; ka jingithuh bad ka jingai jingïada ïa baroh ki ktien ki rit paid ha Meghalaya, kynthup ka ktien Bengali, Hindi, Urdu, Assamese, Nepali, bad kiwei.
Haba khot ba dei ban pynlong ïa ka riti synshar kaba khuid bad ka ïaid beit u MDC barim u la ong, “Ka jingïaibteng ban leh bym suitñiew ïa ki ktien ki rit paid ka pynkheiñ ïa ka riti synshar bad ki hok ha ka synshar paidbah. Kine ki kynhun jaitbynriew ki don ka khana pateng halor ki jingnoh synniang sha ka roi ka san jong ka jylla Meghalaya, hynrei ki dang sah ha ka jingshah kyntait na ki riew thaw aiñ bad ha ki kam ka bha ka miat.”
“Kumta ngi kyrpad ïa ka sorkar jylla, ka sorkar pdeng bad baroh ki jaka treikam bad jaka pule ba kin leh noh mardor ïa kane ka kam khnang ban wanrah ka jingtehsong lang ïa baroh. Ka riti synshar ka ri India ka pynlong kongsan ïa ka jingdonkam ka jingkynthup lang, ka jingïalong mar katjuh bad ka hok na ka bynta baroh bad kine ki rukom pyrkhat ym dei ban ïapeiñ satia. Lada pynslem ïa ka hok ka long ruh kumba kyntait ïa ka jingbishar hok. Ngi dawa ba dei ban shim kam mardor na ka bynta ka bha ka miat, bad ka synshar kaba bha,” u la bynrap.
