Shillong, Naitung, 06: Ka kali ba la shong da u MLA ka North Shillong Consttiuency u Bah Adelbert Nongrum bad ïa kawei ka kali riewpaidbah ki la shah syllad ha kawei ka kali S-Presso kaba la pynher sted bha da ka jingshongshit khawyiang.
Kane ka la jia ha surokbah Guwahati-Shillong ha Lad Umïam, Ribhoi District ha ka sngi U Blei ha ka por kumba 6:45 baje janmiet.
Katkum ka khubor ba la iohlum la ïathuh ba ym shym la don mano mano ruh ba mynsaw ha kane ka jingjia. U nongniah jong ka kali S-Presso kaba don ïa u number ML 05 AB 8537 ba la ñiah da u Ksankupar Jyrwa ka la leit tynrah kynsan ïa ka Kali Maruti 800 kaba don ïa u number ML 05 C 6579 bad hadien kata ka la tynrah sa ïa ka Kali Scorpio ba don ïa u number ML 11 0808 kaba dei ruh ka kali jong u Bah Adelbert Nongrum kaba la julor malu mala.
Ki Pulit kiba la ioh jingtip halor kane ka jingjia, ki la leit tan noh ïa ki kali ba la julor sha Umïam Police station.
Halor kane ka jingjia ki Puit ki la register case ha Umïam Police Station bad ka jingtohkit ruh ka dang ïaid shakhmat.
U Bah Adelbert Nongrum ha ka jingïakren bad ki lad pathai khubor hadien kane ka jingjia, u la ïathuh ba kane ka la jia tang na ka daw ba u nongñiah ka kali S-Presso u la buaid hynrei donbok ba ha kane ka jingjia ha kaba ma u, ka kiaw, ka kurim bad ki khun ki dang thmu ban leit sha Umsning.
Kum u nongmihkhmat paidbah u la kyntu ïa ka tnat Pulit Traffic ba kin peitngor bad ban leh da kaba tyngeh ïa ki briew kiba niah kali ryngkat ka jingbuaid khawyiang namarba ka buh jingma ruh wat ïa kiwei pat ki nongleit nongwan ha surokbah.
