Shillong, Naitung 23: U MP ka Voice of the People Party (VPP) na Shillong, u Dr Ricky AJ Syngkon u la kyrpad ka jingtuklar jong u Myntri Ïada Ri u Rajnath Singh haba ïadei bad ka jingdonkam ban pyntreikam ïa ka Inner Line Permit (ILP), nangta ka jingkynthup ïa ka ktien Khasi hapoh ka khyrnit kaba 8 ka riti synshar ka ri bad kiwei pat ki jingsngewkhia kiba ïadei bad ka jylla Meghalaya bad ki jylla kane ka thaiñ shatei lammihngi.
Ha ka shithi ba la phah sha u Singh, u Dr Syngkon u la banjur ka jingdonkam ka ILP ha Meghalaya ban buh ki kyndon halor ka jingwan ki briew ba nabar bad ban ïada ïa ka jingithuh ka kolshor ka jylla, nangta ka hok longtrai ka jaka, bad ka jingshngaiñ ka ïoh ka kot ka kamai kajih ki nongshong shnong riewlum.
“Kane ka jingdawa kaba la slem na ka bynta ban pynjlan ka jingpyntreikam ïa ka Inner Line Permit (ILP) ha ka jylla Meghalaya ka la bteng kum ka kam kaba sngewkhia bha na ka bynta ki jaitbynriew trai ri trai muluk. Ki nongshong shnong ka jylla ki la nangkiew ka jingsngew tieng halor ka jingïaikiew ka jingwan rung kyrthep ki briew ba nabar ri, kynthup kiba wan na ki khappud ka ri India bad Bangladesh bad ka jingïoh jingtip ba ki la don kiba pynlong shnong ba khlem ïoh bor bad ka jingkyntur pud sha ki jaka ki riewlum, khamtam ha ki khappud kiba don jingma bad ki thaiñ kiba tlot.
Kane ka jingpynbor haba ïadei bad u pud u sam ka la long ka jingma kaba shyrkhei ïa ka jingithuh ka kolshor, ki hok longtrai ki jaka bad ka jingshong shngaiñ ka ïoh ka kot bad ka kamai kajih ki riewlum ka jylla Meghalaya. Ka jingpyntreikam ïa ka ILP, kaba la treikam ha ki jylla ba marjan kum ka Arunachal Pradesh, Mizoram, Manipur bad Nagaland, la ïohi ba ka long kaba donkam bad ka rukom treikam kaba mynta ban ïada ban thaw ki kyndon halor ka jingwanrung kiba nabar bad ban pynneh pynsah ban tyngkai ïa ka jinglong riewlum kaba kyrpang jong ka jylla,” u la ong.
“Nga, namarkata, nga kyrpad ïa ka jingkyrshan jong phi ban ïakren lem ïa kane ka kam bad ka tnat ki Kam Pohïing ka sorkar pdeng bad ban sdang ki jingïasyllok kiba tei bad baroh ki nongshong shnong ban bishar ïa ka jingdawa ïa ka ILP ha Meghalaya da kaba khuid, kaba don jingmut bad kaba ïaid ruh katkum ka por. Da kaba ai ïa ka ILP kan sa pynurlong ïa ka jingangnud ba la slem bha da ki nongshong shnong bad kan sa aibor biang ban ïoh ka jingshaniah ïa ki jingdawa ka riti synshar ba la ai sha jaitbynriew trai ri trai muluk,” bynrap u Dr Syngkon.
Shuh shuh u MP u la kyrpad ïa u Myntri Ïada Ri ban kyrshan lem ban kynthup noh ïa ka ktien Khasi hapoh ka khyrnit ba 8 ka riti synshar ka ri, da kaba ai ka jingithuh kaba kongsan kum ka dak jong ka jingriewspah ka jinghiar pateng ka kolshor jong ka jylla.
“Ka ktien Khasi language, ba la kren da ki nongshong shnong babun ka Meghalaya, ka dei ka dak kaba kongsan jong ka jingriew spah ka kolshor bad ka khana kaba hiar pateng. Wat hapdeng ka jingpyndonkam ïar ïa ka, la ka dei ha ka thoh ka tar. Ka jingithuh hapoh ka jylla ha ki kam sorkar, bad ki jingpyndap ïa baroh ki kyndon treikam haba ïanujor bad kiwei ki ktien ba bun kiba la dep ban ithuh hapoh ka khyrnit ba 8, hynrei ïa ka ktien Khasi pat kam shym la ïoh ka jingithuh hapoh ka Eighth Schedule jong ka Constitution ka India.
Kumta la kyrpad ïa ka jingkyrshan ka tnat Ïada ri ban rah lang ïa kane ka jingdawa kaba la slem bad ka Ministry of Home Affairs bad kiwei ki bor ban pynsuk ïa ka jingïoh jingithuh ïa ka ktien Khasi- kaba la dei ka jingangnud ba la slem na ki nongshong shnong ka Meghalaya,” u la ong.
U Dr Syngkon u la kyrpad ruh ïa ka tnat ban plie ki lad aikam na ka bynta ki samla hapoh ki shnat treikam ka tnat defence kiba don ha Meghalaya, kyrpang ha ka Group ‘C’ bad ki support staff position.
U MP u la kyrpad ban kyntiew kyrdan noh ïa ka Indian Institute of Tourism and Travel Management (IITTM), Shillong Centre, sha ka jaka treikam kaba pura bad kaba laitluid da ka jingdon jaka pule kaba heh, ki jaka shah hikai bad kiwei kiwei.
U Dr Syngkon u la pan ka jingïarap ban ailad ïa ka ‘Institute of National Importance’ (INI) ka kyrdan sha ka North Eastern Indira Gandhi Regional Institute of Health and Medical Sciences (NEIGRIHMS), Shillong, khnang ban kyntiew ïa ka pule puthi bad ka jingai jingshakri kaba kynsai.
U MP u la kyrpad ban wanrah bad ban pynkhlaiñ biang ka jingpynïasoh na ka lyer kaba dei na Shillong Airport (Umroi) sha ki jaka ka thaiñ shatei lammihngi ba kynthup ïa ka Dimapur, Aizawl, Agartala, bad Silchar.
Katkum ka jingong jong u, ka la don ka jingdawa kaba jur bha na ki paidbah ban wanrah bad pynkhlaiñ ka jingpynïasoh ïa ki kad liengsuiñ na Shillong Airport (Umroi) sha ki jaka kane ka thaiñ shatei lammihngi, kyrpang ïa ka Dimapur, Aizawl, Agartala bad Silchar. Kine ki lynti ki dei kiba la pyntreikam mynshwa hapoh ka UDAN scheme hynrei ka la mad ki jingeh bym lah ban bteng ïa ka kam. U la ong ba ki lynti na Shillong-Dimapur, Silchar bad Agartala route, kaba mynta ka khlem treikam shuh la donkam ban pynim biang.
“Ka jingpynim biang ïa ka, kan long ka jingmyntoi ïa kiba shong liengsuiñ hapdeng ka Meghalaya bad ki jylla kum ka Nagaland, Assam bad Tripura. Kumta ban pynkhlaiñ kumjuh ruh watla ka Shillong-Aizawl route ka dangneh ha ki jingtreikam jong ka, ka kut tang ha ki jingjia shah pynthut. Kumta da kaba pykhlaiñ ïa ki lad pyniasoh na Shillong kan pynlah ia ki nongshong shnong ka Meghalaya ba kin lah ban leit jingleit beit beit sha Delhi,” ong u MP.
“Nga da angnud shisha ïa ka jingkyrshan jong phi, ban shim ïa kane ka kam bad ka Ministry of Civil Aviation bad ki Airports Authority of India, ban wanrah biang ïa ka jingtreikam ka liengsuiñ ka Shillong-Dimapur.
