Shillong, Naitung, 25: Ka Tourism Committee jong ka Hima Sohra ha ka sngi Thohdieng ka la khang ïa ki nongjngohkai pyrthei ban bam khana ne shet jingshet harud surok namar ka jingsngewkhia ïa ka jingpynjaboh ba isaitmet bad ka jingbret pathar ïa ki jaboh jabaiñ ha shilynter ka surok naduh Mawkdok shaduh Sohra bad sha kiwei kiwei ki jaka kiba dang hap hapoh u pud u sam jong ka Hima Sohra.
Ha ka jingïakren bad ki lad pathai khubor u Syiem Khynnah ka Hima Sohra u Pa’iem Maremdor Syiem u la ong ba la khang bad mana ban bam khana, ban shet jingshet harud surok, ban ïa bam sha kino kino ki jaka ha shilynter ka surok Mawkdok ter ter shaduh Sohra bad ha kiwei kiwei ki jaka khlem da ïoh jingbit shwa na ki Dorbar Shnong.
Baroh ki kali kiba wan rung shapoh Sohra ki dei ban da rah lang ïa ki pla platik ba thep jaboh jabaiñ, bad la mana ruh ban bret ïa ki jaboh jabaiñ sha madan madiah lane sharud lynti.
U la ong ruh ba yn shah ban sah miet (night camping) tang ha ki jaka ba la pynbna kum ki Camping Sites bad yn ym shah shuh ban sah miet kat shaba lap ba shem ha ki jaka jngohkai pyrthei kiba don ha ka thaiñ Sohra.
U Pa’iem Maremdor u la ong ba kino kino ki nongjngohkai pyrthei nangne shakhmat kin hap ban shim wai da ki Tourist Guide khnang ba kin lait na kino kino ki jingjia ba sngewsih haba ki leit ïaid kjat sha kino kino ki bynta jong ka thaiñ Sohra.
Shuh shuh u la pyntip ruh ba ki Vloggers, ki Social-media Influencer bad ki lad pathai khubor ki dei ban da ïoh jingbit shwa na ka Tourism Commitee haba ki kwah ban kyntiew ne ban pyni paidbah ïa kino kino ki jaka bym pat bna pyrthei kiba don hapoh u pud u sam jong ka Hima Sohra.
Haba bynrap halor kane u Nongaibuit jong ka Tourism Committee ka Hima Sohra u Bah Alan West Kharkongor u la ong, ‘teng teng lada ki Vloggers, ki Social-media Influencer bad ki lad pathai khubor ki pynbna paidbah ïa ki jaka jngohkai pyrthei kiba thymmai ba dang shu lap kin wan ki briew kiba nabar ha kaba kim pat tip ïa ka jinglong jingman jong ka jaka kaba lah ban lam wat sha u pud ba sngewsih ne wat sha ka jingïap briew.”
“Ym dei ba ngi khang, hynrei wat mynta ki nongjngohkai pyrthei ruh ki lah ban wan kai sha Sohra bad ki lah ban leit bam khana tang ha ki jaka ba la pynïaid da ki kynhun bapher bapher kaba ki hap ban siew da ka pisa. Ngi la shim ïa kane ka sienjam khnang ban ïada ïa ka jingshah pynjaboh shaba palat ka mariang kaba la isaitmet haduh katta katta,” u la bynrap.
“Ka jingïada ïa ka mariang ka long ban pynneh pynsah ïa ka jingkhuid jingsuba bad ka jingkiew ki kam jngohkai pyrthei bad ban kyntiew ruh ïa ka ïoh ka kot jong ki trai shnong,” u la ong.
“Kine ki dei ki kyndon ba ngi la pyntip bad kin treikam noh mardor naduh kane ka sngi,” la ong u Bah Kharkongor da kaba pan ruh ïa ka jingïatreilang na baroh ki paidbah nongshong shnong ka jylla bad na ki nongjngohkai pyrthei nabar ka jylla bad nabar ri.
