Shillong, Jymmang, 06: U Babu Kular Khongjirem u nonghikai jong ka KJP Girls Higher Secondary School, Shillong u la pynpaw ïa ka jingsngewkhia halor ka jingtynrong kam ka Sorkar ha ki nonghikai ban phah lum ïa ka Census lane ka Khanasamari namarba kane kan ktah ïa ka pule ka puthi jong ki khynnah skul.
Ha ka jingïakren bad ki lad pathai khubor ha ka sngi Baar u Babu Khongjirem u la ong ba ki nonghikai kim dei satia ki Robot ban trei tam sa kumba 2 ne 3 kynta ynda la wai skul ban leit rung sha ki thliew iing jong ki nongshong shnong na ka bynta ban lum ïa ka Khanasamari nalor ba ka jingthait jingjrem kaba ki la pynlut por ban ai jinghikai ïa ki khynnah skul baroh shi sngi ha ki saw kynroh jong ki kamra klass.
U la kynthoh ruh ïa ka Municipal kaba la ïaid lait ïa ki bor pynïaid skul da kaba phah beit beit ïa ki shithi thungkam sha ki nonghikai khlem da khot ne ïasyllok shwa ïa ki Principal.
U la ai jingmut ïa ka Sorkar ban thung da ki samla wadkam kiba la nang la stad kum ki nonglum khanasamari khnang ban pyllait noh ïa ki nonghikai.
Ha kajuh ka por u la ai khublei ïa ka Sorkar Jylla kaba la mynjur bad ithuh ïa ka ktien Khasi bad Garo kum ki ktien sorkar lane ka Official Language hadien ba ka Kynhun Myntri jong ka Sorkar Jylla dang shen ka la mynjur ïa ka Ordinance.
U la ong ruh ba ka sorkar ka dei ban bthah ïa ka Meghalaya Board of School Education (MBoSE) ba kan ailad ïa ki khynnah skul kiba ïakhun ïa ka eksamin Higher Secondary School Leaving Certificate (HSSLC) bad ïa ka Secondary School Leaving Certificate (SSLC) ban jied la ki kwah ban thoh ïa ka eksamin ha ka ktien Khasi, Garo ne ha ka ktien English.
