Shillong, Nailar, 04: U Myntri ka Sorkar Jylla u Marcuise N. Marak ha ka Lah Sngi u Blei ula ong, lada ki paidbah ka rilum Khasi-Jaintia kim kwah ïa ka Rel, hynrei ki paidbah ka rilum Garo kin dawa ïa ka Sorkar ba kan pynïar ïa ka jingpynïasoh da ka lynti Rel na Mendipathar sha kiwei kiwei ki bynta jong ka rilum Garo.
Ha ka jingïakren bad ki lad pathai khubor, u Marak uba long ruh u MLA jong ka Williamnagar Constituency, u la pynkynmaw ïa ka jingdawa jong u MLA ka Siju-Rongara u Rakkam A Sangma, uba long u Myntri ka Sorkar Jylla ban pynïasoh ïa ka lynti Rel shaduh Baghmara ïa kaba la ai jingkyrshan ruh da ki MLA jong ka rilum Garo.
“Ngam da kham don jingtip, hynrei lada (ki paidbah) ka rilum Khasi-Jaiñtia kim treh ïa ka Rel, khlempep ngin dawa (ha rilum Garo) ban pynïasoh ïa ka lynti Rel Mendipathar. Lada ka rilum Khasi-Jaintia kim mynjur ïa ka Rel, khlempep ka rilum Garo kam dei satia ban duh ïa kane ka kabu,” u la ong.
U la ong ruh ba ka jingpynïasoh ïa ka lynti Rel ka ban pynïasoh sha South West Garo Hills kan pynmyntoi namarba ka dei ka thaiñ kaba kham seisoh ha ka rep ka riang.
“Lada poi ka lynti Rel kan pynïasoh na Phulbari sha Dhubri, bad kan pynsuk bha ïa ka jingïadei ha ka khaii ka pateng jong ki paidbah ha West Garo Hills,” u la bynrap.
Haba kylli, “ka biang palat na ka bynta jong nga lada pynïasoh ïa ka lynti Rel shaduh Baghmara namarba kan hap ban ïaid lyngba na ka shnong Williamnagar.”
