Shillong, Nailar, 07: Ka Kynhun Myntri ha ka sngi Palei ka la mynjur ban pynjlan biang ïa ka jingaiwai ïa ka Orchid Polo bad Jiva Resort ha Sohra sa 30 snem, ha kaba ki Resort ki la mynjur ban siew 4% na ka jingmih (Gross Revenue) jong ki sha ka Sorkar.
Ka jingpynjlan ïa ka jingaiwai kan long na ka bynta 30 snem, kaba pynlong ïa ka por aiwai baroh sha ka 60 snem na ka bynta ka Orchid Polo bad ka Jiva Resort.
Kine ki Resort kin siew 4% na ka jingmih kaba ki ïoh lum sha ka Sorkar, nalor ba ki hap ban siew ïa ka bai shim wai 5 lak tyngka ha ka shi snem.
Kine ki Resort mynshwa ki siew beit ïa ka bai shim wai kaba long T. 2 lak bad T. 2.48 lak.
Haba kren sha ki lad pathai khubor hadien ba la wai ïa ka jingïalang, u Myntri Rangbah ka jylla u Conrad K Sangma u la ong, “hapdeng kata, mynta ngi la ai wai ïa kiba bun ki jaka sha ki riewshimet bapher bapher bad ngi la pynjlan ïa ka jingai wai haduh 60 snem katba nang mih ka jinglah ban treikam ïa ka projek. Da kaba pynshong nongrim halor kata, ka Orchid Polo kumjuh ka Jiva Resort ki la kyrpad ïa ka Sorkar lada ki lah ruh ban ïoh ban shim wai sa 30 snem katkum ki sienjam ba la shim da ka Sorkar ban ai sha ki kynhun thymmai kiba dang wan tyrwa mynta. Kumta, kane ka mat ka la wan poi ha ka miej ïakren jong ka kynhun myntri bad ynda ngi la bishar ngi la ai ka jingmynjur ban pynkiew ïa ka bai wai sa 30 snem tam sha baroh ar ngut ki nongpan wai bad ngi la rai ruh ban pynkiew ïa ka dor kaba ki siew sha ka 4% na ka jingmih baroh jong ki.”
“Kumta, nalor ka T. 2 lak bad T. 2.48 lak, mynta kin hap ban ai sha ngi na ka jingïoh lum ïa ka jingmih kaba long 4% kaba ngi la shim rai bad ha kajuh ka por kin hap ban siew ruh ïa ka bai shim wai shisien shi snem kaba kot T.5 lak sha ka Sorkar.”
