Shillong, Nailar, 07: Kum ka jingpynsuk shikatdei eh ïa ki paidbah, ka Sorkar Jylla ka la shah ïa ki paidbah ba kin pan jingbit na ka bynta ban shna iing da kaba shu aplai Online bad kan pynsuk ïa ki paidbah ba kim donkam shuh ban leit hi da la ka met ban leit thep ïa ki aplikeshon bad kane ka rai kan treikam naduh ka 11 tarik, Nailar.
Ïa kane la pynbna da u Myntri Rangbah ka Jylla u Conrad K Sangma hadien ba la wai ka jingïalang Kynhun Myntri, kaba la mynjur ruh ïa ka Second Amendment jong ka Meghalaya Building Byelaws, 2025, kaba thmu ban pynbeit ryntih ïa ka rukom pan jingbit ban shna iing bad ban pynsuk shuh shuh ha kaba leh ïa ka khaïi ka pateng.
“Mynta ngi la pdiang ïa ka Online Building Permission System. Naduh ka 11 tarik, Nailar, ki paidbah kiba aplai na ka bynta ban pan jingbit ban shna ïa ki iing ki sem ki la lah ban shu aplai online bad kim donkam shuh ban leit hi da la ka met,” ong u Sangma ha ka jingïakren bad ki lad pathai khubor ha ka sngi Palei.
“Ïa ka technical permission bad ka jingmynjur ym donkam shuh ban ïoh na ka Meghalaya (MUDA) na ka bynta ki iing ki bym don eh ha ka jingma, kum ki iing sah, ki dukan ai wai bad ki iing karkhana kiba heh haduh 2500 sq ft lane ka jaka ba la tei haduh 3000+ sq ft bad 3000 sq ft, bad G+1 bad 7 mitar ka jingjrong jong ka ïing mala,” u la ong.
Katkum ka jingong jong u, yn sa ai bor ïa ka kynhun ki Architect bad ki Engineer ban pynshisha hi dalade haba shna ïa ki iing mala ki bym buh jingma than.
Na ka bynta ki iing bun mala, (G+2 bad ka jingtei kaba kot haduh 750 sq ft), u Sangma u la ong ba yn donkam ïa ka Third Party Agency na ka bynta ka jingai jingbit.
“Namarkata, ngi dang ïaleh ban pynthikna ba kan long kaba suk ïa ki briew ban ïoh ïa ka jingbit ban shna iing bad ïa kane ka jingpynbeit thymmai la mynjur da ka kynhun myntri,” u la bynrap.
