Shillong, Nailar, 11: Ka Hynñiewtrep Integrated Territorial Organisation (HITO) ha ka Lah Sngi u Blei ka la ujor sha u Myntri ka Sorkar Jylla uba khmih ïa ka tnat Animal Husbandry and Veterinary u Bah AL Hek ban dawa ba ka Sorkar ka dei ban pyrkhing mardor ïa ka jingkhaïi be-aiñ ïa ki jingri bad ka jingshalan doh khlem aiñ lyngba ka jylla Meghalaya.
“Ka HITO ka sngewkhia bha halor ka jingkhaïi tuh khlem da tehlakam bad ka jingshalan be-aiñ ïa ki masi, ki syiar, ki sniang bad kiwei kiwei ki jingri jingdub shapoh bad lyngba jong ka jylla Meghalaya. Kane ka jingma ka nang kiew manla ka sngi bad ka buh jingma ïa ka ïoh ka kot jong ki paidbah ka Jylla,” la ong u President ka HITO u Bah Donbok Dkhar ha ka jingïakren bad ki lad pathai khubor.
“Ka jingkhaïi tuh ïa ki masi sha Bangladesh ka la jur bha haduh katta katta, ha kaba ka jingioh kurup manla ka por da ki shipai BSF ka Meghalaya Frontier kumba la paw ha ki lad pathai khubor. Kaba pynsngewsih shuh shuh ka long ka jingrung khlem pyrkhing jong ki syiar bad ki sniang ïa kaba la leh da ki kynhun barieh jong ki snar khaïi tuh, ki Dalal trai ri bad da ka jingïatreilang jong ki katto katne ki Pulit,” la kynnoh ka seng.
“Ka Byrnihat ha Ri-Bhoi District ka dang long ka jaka rung ba kongsan na ka bynta ki kam khaïi be-aiñ, hynrei ym pat don ka rukom treikam jong ka Sorkar ban pyrkhing ne ban peitngor ïa ki mar kiba wanrah nabar ne kiba ïaid lyngba. Kane ka jingthylli ka ailad ïa ki kynhun runar ban treikam laitluid katba ka Sorkar Jylla ka duh ïa ka khajna,” la ong ka seng bad bynrap, “kaba pynsngewsih ka long ba kane ka jingkhaïi be-aiñ ka la khring ïa kiba bun ki khynnah ban pep skul shiteng por ha Ri-Bhoi, namar ka jingmyntoi kaba ki ioh na ka leit jingkhaïi tuh kaba pynmyntoi ban ïa kaba leit pule.”
Ha ka dorkhas ba la aiti sha u Myntri ka tnat Animal Husbandry and Veterinary, ka HITO ka la dawa ban buh ïa ka Check Gate kaba talasi ïa ki mrad bamdoh ha ki khyrdop rung bad khyrdop mih ka ban treikam baroh 24 kynta.
Ban da pynshisha ïa ka jaka ba la wanrah ïa ki mrad bad ka jinglong trai da ki kot ki sla kiba biang ha manla kawei pa kawei ka jingshalan.
Ban peit bniah ïa ka koit ka khiah jong ki mrad bad ban pynshisha shwa ban shah ïa ki mrad bamdoh ban rung sha ka jylla.
Ban don ki kynhun jurip kiba ïaid pahara ban pynlong ïa ka jingtalasi kyndit, khamtam ha ka por mynmiet ha kaba bunsien ka jingkhaïi be-aiñ ka ju jia.
Ban pynshitom ïa ki nongkhaïi tuh da kaba daiñ kuna, kiba donkti lang bad kino kino ki ophisar kiba ïarap ne ai jingïada.
Ban pynthikna ba baroh ki mar kiba wan nabar katkum ka aiñ kin noh synniang sha ka pla tyngka jong ka Jylla.
Ban pynsngewthuh paidbah bad ki lad kamai bapher bapher kiba pynjngai ïa ki samla na ka jingkhaïi beaiñ.
“Lada ka Sorkar kam leh eiei mardor, ka HITO kan sdang ban talasi laitluid ban ithuh ïa ki lynti, ki nongïarap, bad ïa ki ophisar ki bym kitkhia ïa la ka jong ka kamram kiba ailad ïa ka jingkhaïi beaiñ. Ïa kine ki jinglap yn sa pynpaw pyrthei sha ki bor ba dei peit. Ki jingpynpaw pyrthei ym tang ba kin pynjah burom ïa ka Sorkar hynrei kan pynduh jingshaniah ïa ki paidbah ha kane ka Sorkar,” la ong shuh shuh ka HITO.
