Shillong, Nailar, 12: Ki shipai BSF ka Megha laya Frontier kiba ap pahara ha khappud jong ka Megha laya bad ka ri Bangladesh ki la pynbna ïa ka “Operation Alert” ha shilynter ka khappud jong ka Indo–Bangladesh kaba la sdang naduh ka 10 tarik bad ka ban kut haduh ka 16 tarik, Nailar, 2025 ban pynthikna ïa ka jingïada kaba khlaiin katba ka ri India ka dang pynkhreh ban rakhe ïa ka sngi ïoh laitluid ka ban sa long ha ka 15 tarik, Nailar, 2025.
Da ka jingpyntreikam ïa ka “Operation Alert” ka tnat shipai BSF kan ïatreilang bad ki Pulit ka Jylla bad kiwei pat ki tnat treikam jong ka ri ban khanglad ïa ki kam runar ruser ha khappud.
Ha u kyrwoh ba la phah sha ki lad pathai khubor, ka tnat shipai BSF ka la pyntip ba ka la phah shuh shuh ïa ki shipai ha ki bynta ka khappud bad la phah ruh ïa ki heh Ophisar shipai na ka Frontier Headquarter bad na ki Sector Headquarter ban hiar sha khappud na ka bynta ban khmih ïa ka jingpyntreikam ïa ka Operation Alert.
Ka Operation Alert ka kynthup ïa ka jingpahara baroh shisngi, ka jingpeit bniah ïa ki jaka khappud kiba dang lait rynghang na ki wah bad na ki jaka lum bad ban khanglad ïa ki jingkhaii tuh ïa ki masi, ki mar khaii beaiñ bad ka jingjam beaiñ sha u pud u sam jong ka ri.
U Inspector General (IG) ka Frontier Headquarter BSF Shillong u O.P. Upadhyay uba dang don mynta sha khappud u la ong ba ka “Operation Alert” ka pyni ïa ka jingangnud jong ka tnat shipai BSF ban ai jingshngaiñ ïa ka ri bad ban ïada na kino kino ki jingshah pynthut ha ki bor kiba thmu ban ïaleh pyrshah.
Shuh shuh ka tnat shipai BSF ka la pyntip ba kane ka Operation kan treikam tad haduh ka 16 tarik, Nailar ha baroh bynta khappud jong ka jylla Meghalaya.
