Shillong, Nailar, 22: Ki Pulit ka Special Cell jong ka District Executive Force, West Jaiñtia Hills District ha ka sngi Thohdieng ha ka por kumba 2:30 baje mynstep hapoh ka jingbthah jong u Additional Superintendent of Police (ASP) ka West Jaiñtia Hills u Bah Jason Mairom ki la pynlong ka jingpynap shrip ha ki bynta jong ka shnong Demthring hadien ba la ïoh pdiang ïa ka jingtip kaba bniah na ki tnat syntiat ha kaba ïadei bad ka jingkit tuh ïa ki thuk thuk ar shaka.
Ha u kyrwoh ba la phah da u Superintendent of Police (SP) ka West Jaiñtia Hills District u la pyntip ba ha ka jingpynap shrip, ka kynhun Pulit la ïoh bat ia kawei ka kali Alto K10 kaba kit bun bah ki tiar kali. Ha ka jingtohkit ki briew kiba shong hapoh kane ka kali ki la ialam sha ka jaka ba la buhrieh ia ki thuk thuk ar sha ka ba la buhrieh hajan kawei ka khlaw.
U SP u la pyntip ba ki lai ngut ki briew ki dei kiba la tip kyrteng kum u Jopparson Rabon, 24 snem ka rta uba sah ha ka shnong Thangraiñ uba la niah ia ka kali Alto K10 ka bym don satia ia u registration number plate,katba uwei pat u dei uba la tip kyrteng kum u Meshanki Langstang, 22 snem ka rta uba sah ha ka shnong Thangraiñ uba shong lang ha kajuh ka kali Alto K10 bad uwei pat u dei uba la tip kyrteng kum u Paulme Sungoh, 21 snem uba sah ha ka shnong Nongbah Ïawmusiang ïa uba la lap ha kawei ka khlaw hajan Demthring, ha kaba la buhrieh ïa ki thuk thuk ar sha ka.
Ki lai tylli ki thuk thuk ar sha ka ba la shah rong tuh ki long ka Yamaha, ka Cygnus Ray ZR ba don ïa u nombar MLO5V 4471, MLO5Y 5008 bad MLO5AC 0799.
Ha ka jingtohkit ki lai ngut ki la phah ba ki la tuh ïa kine ki thuk thuk ar sha ka na ka thaiñ Laban bad na ka thaiñ Jhalupara ha ka nongbah Shillong.
Ïa ki thuk thuk ar shaka ba la shah tuh bad kynthup ïa ka kali Alto K10 ba la pyndonkam da kine ki snar nonglute la kurup bad la rah noh sha Jowai Police Station ban pynlong shuh shuh ïa ka jingtohkit kaba bniah.
