Shillong, Nailur 13 : U Myntri Rangbah barim ka jylla u Dr. Donwa Dethwelson Lapang ia uba ki ju tip paidbah kum u Dr. D.D Lapang u la khlad noh ha ka 12 tarik u Nailur 2025 ha Bethany Hospital, Shillong. U Dr. Lapang u la khlad noh ha ka rta kaba 96 snem namar ka jingshitom kaba la ban la kham slem namar ka jingnoh tymmen ka met.
Khyndiat shaphang u Dr. Lapang, la kha ia u ha ka 10 tarik u Ïaiong 1929, u dei u khun ba nyngkong jong u bah Donwa War. U Dr. Lapang u dei uba wan na ka longiing longsem kaba duk, kumta ha ka jinglong samla jong u- u hap ban trei byllla sngi kum u nongbylla tih surok ban kyrshan ialade ban bteng ki jingpule. Kham hadien u la ioh kam sorkar bad u trei kum u Sub Inspector of School, ha u snem 1958 u la poi kha bad ka kong Amethyst Lynda Jomes Blah bad u don 2 ngut ki khun.
Hadien ka jingshakri kaba la katto katne snem ha ka kam sorkar u la ialeh ia ka elekshon nyngkong eh ha u snem 1972 hadien ba la ioh ia la ka jong ka jylla ba pura bad ha katei ka por u iakhun kum u kyrtong shimet na Nongpoh konstitwensi bad u la jop ha katei ka elekshon. Ha u snem 1992 haduh 1993 u la shimti kum u u Myntri Rangbah ka jylla bad ha u 2003 sa shisien u la shah jied biang kum u Myntri Rangbah ka jylla hynrei ha u snem 2006 u la risain noh.
Hynrei ha u snem uba bud kata ha u 2007 u la shimti biang kum u Myntri Rangbah bad hadien kane ka la wan sa ka elekshon ha u snem 2008 bad ha katei ka por ka seng Congress ka la jop donburom bad sa shisien biang la pynkhamti ha u ia ka shuki Myntri Rangbah ha ka 10 tarik u Lber 2008 hynrei ha katei ka por ruh u la risain biang namarba um ioh ia ka jingkyrshan ba pura na ki MLA bad dei ha u Jymmang 2009 ba ka sainhima sima ka la sdang wan dur biang u la shimti biang ha ka sien kaba saw kum u Myntri Rangbah hynrei hadien kane ka wan noh ka President’s Rule ha u snem 2010.
U Dr.Lapang u dei uba la neh bun bun snem ha ka seng Congress bad u la bat kum u MLA ka Nongpoh tad haduh ba un shongthait hi noh ha u snem 2018 hynrei kham hadien ba u la shongthait u la pyniasoh noh ialade bad ka seng NPP bad u don bad ka seng NPP tad haduh ka sngi ba kut jong u.
Ha ki sngi ki por ba u long kum u nongmihkhmat u la iakhun dohiap ban pynioh ia ka them Bhoi la ka jong ka District bad kane ka jingangnud jong u ka la urlong ha kaba ka them Bhoi ka la ioh ia ka Ri Bhoi District. U la wanrah shibun ka roi ka par bad ki jingkylla ha ka them Ri-Bhoi baroh kawei bad la ai nam ai burom ia u kum u kpa jong ka Ri Bhoi.
Ia ka met jong u Dr. D.D Lapang yn tep ha ka 15 tarik u Nailur 2025 ha u lum jingtep jong ka Balang Presbyterian Jaiaw, hynrei shuwa ia kane kan don ka jinglehburom khatduh ha Madan Student.
Ha ka por ba la wanrah ia ka met u Dr. Lapang sha iing la ia donlang u MP barim ka Lok Sabha u bah Vincent H Pala, u Symbud Myntri Rangbah ka jylla u bah Prestone Tynsong, u MLA ka Mawhati u bah Charles Marngar, u MLA barim u bah H.M Shangpliang, kiba haiing hasem ha ryngkat ka jingdonlang ki paralok kiba ia ieid ia jan bad u Maheh Lapang.
