Shillong, Nailur, 13: Hapdeng ka sngewkhia na ka jingshah ot ryndang jong u samla Bunsiewdor Nongrang ha ka step phyrngab jong ka 6 tarik, Nailur 2025 bad hadien ka jingïathuh une u samla ïa ka kyrteng jong uwei u rangbah napoh ka shnong uba donkti ha ka kam runar, ka dorbar shnong Mawlyntriang ha ka sngi Saitjain ka la lum da ka dorbar paidbah ban ïa phylliew jingmut bad ban shim ïa ka rai kaei kaba kin leh halor kane ka jingjia.
U Sordar jong ka shnong Mawlyntriang u Bah T.Nongsiej ula ïathuh ba ka shnong da ka jingmynjur ka dorbar paidbah la shim ïa ka rai ban dawa ïa ki bor jong ka ain ban set phatok shi jingim ïa u Bah Linter Ryntathiang uba la shah kynnoh ba u dei uba donkti ha ka jingot ryndang ïa u samla Bunsiewdor.
U Sordar ula ïathuh ruh ba une ujuh u briew u la pynjahburom bad u la pynshong syier ruh ïa ka shnong ka thaw baroh kawei naduh u snem 2010 bad ula leh ruh bun tylli ki kam bymman bad mynta lei u la wanrah syndon sa ïa ki briew kiba nabar shnong ban ïaleh ïa ki kam runar ruser hapoh u pud u sam jong ka shnong.
Na ka liang ki bahaïing jong u Bah Linter Ryntathiang ki la ong ba ha ki por mynshwa ki la bah jamin ïa u Bah Linter bad ki sneng la kraw ïa u da ka jingkhmih lynti ba un kylla noh kaba mut hynrei ha kane ka kynti kaba mynta ki la ong ba kin ïa mynjur lang bad ka jingpynbeit jong ka shnong bad kin ïatreilang ruh bad ka shnong.
Ha ka dorbar paidbah, nalor ki paidbah jong ka shnong Mawlyntriang la ïashim bynta lang da ki khynnah skul kiba la rah ïa ki jingthoh kiba pynrem ïa ki kam sniew kam smeh kynthup ruh da ki dkhot bad ki nongïalam jong ka Khasi Student Union, Nongkhlaw Circle.
Katkum ka jingïathuh ki bahaing u samla Bunsiewdor Nongrang u la ïoh ban mih na Intensive Care Unit bad ki la pynpaw ruh ka jingkyrmen ba un sa ïoh noh shen ka jingkoit bapura.
